Amed – Li Amedê di 29 û 30 Nîsanê de Konferansa Rêveberiyên Xwecihî yên Demokratîk a Amedê, hate lidarxistin. Jinên ku beşdarî konferansê bûn anîn ziman ku xebatên xwe li ser felsefeya civaka demokratîk, ekolojîk û azadîxwaziya jinan bi rê ve dibin.
Li Amedê di 29 û 30 Nîsanê de li Eywana Konferansê ya Alî Emîrî ya Şaredariya Bajarê Mezin a Amedê Konferansa Rêveberiyên Xwecihî yên Demokratîk a Amedê, hate lidarxistin. Konferans bi dirûşma “Em bi vîna jinan komunal dibin, bi rêveberiyên xwecihî civaka azad dihûnin” pêk hat. Di konferansê de hate diyar kirin ku dê rêxistinkirinên komunan bi hev re ava bikin û hate destnîşan kirin ku komun şaredarî ne, şaredarî komun in. Hevşaredara Xana Axparê Semra Akyuz, Endama Meclisa Şaredariya Bajarê Nû Ozlem Yilmaz Kûrtay, Endama Meclîsa Giştî ya Çewligê Sûna Sari û Hevşaredara Rezanê Leyla Ayaz têkildarî konferansê ji ajansa me re axivîn.
‘Armanca me ya yekem jiholêrakirina tundiyê ye’
Hevşaredara Çinarê Semra Akyuz diyar kir ku ew kar û xebatên xwe li ser felsefeya civaka demokratîk, ekolojîk û azadîxwaziya jinan dimeşînin. Semra Akyuz da zanîn ku armanca wan a herî mezin afirandina civakeke xweştir e ku rengê jinan tê de xuya bibe. Semra Akyuz bal kişand ser mijara tundiya li ser jinan û wiha axivî: “Armanca me ew e ku em vê tundiyê ji holê rakin; yanî armanca me ya yekem ev e. Bi hişmendiya baviksalar ev tundî bi carekê neaniye holê, ev tundî wisa dem bi dem di nava civakê de belav bûye. Em xebatên xwe bi daxwaz û tevlîbûna gel; di serî de jin, zarok, kesên temenmezin û astengdaran pêk tînin.”
‘Jin pêşengiya pêvajoyê dikin’
Endama Meclîsa Şaredariya Bajarê Nû Ozlem Yilmaz Kûrtay jî diyar kir ku ew li ser felsefeya ‘Jin, Jiyan, Azadî’ kom bûne û da zanîn ku ew ji bo konferanseke mezin a li Enqereyê amadekariyan dikin. Ozlem Yilmaz Kûrtay rola jinan a di rêveberiyan de bi bîr xist û got: “Bi rastî, em niha pêşengiya vê pêvajoyê dikin; jin hemû barê vê pêvajoyê dikişînin û bi rê ve dibin. Em jin dixwazin zêdetir hem rêxistina xwe bi pêş ve bibin hem jî bibin bersiva vê pêvajoyê.”
‘Divê jin di her gava biryardayînê de hebin’
Endama Meclîsa Giştî ya Çewlîgê Sûna Sari jî bal kişand ser hewcedariya xwebirêxistinkirina jinan a li her qadê. Sûna Sari destnîşan kir ku jin nûnerên demokrasî, wekhevî û azadiyê ne û wiha got: “Armanca me ew e ku jin di her qadê de cihê xwe bigirin, xwedî gotin bin û di girtina biryaran de rola xwe bilîzin. Em dixwazin ku jin li her derê hebin, di her gava biryardayînê de cih bigirin û îradeya xwe nîşan bidin.”
‘Em ê ji bo polîtîkayên jinan biryarên bihêz bigirin’
Hevşaredara Rezanê Leyla Ayaz jî girîngiya konferansê ya ji bo rexnedayîn û plansaziya pêşerojê anî ziman. Leyla Ayaz diyar kir ku ew li ser kêmasiyên 2 salên borî radiwestin û ji bo 3 salên pêşiya xwe nexşerêyekê diyar dikin. Leyla Ayaz bal kişand ser qirkirina jinan û wiha got: “Wekî ku hûn jî dizanin, di vê demê de, bi taybetî jî li Amedê, li dijî jinan qirkirineke pir zêde tê meşandin. Biryarên ku em ê di vê konferansê de ji bo sê salên li pêşiya xwe û ji bo polîtîkayên jinan bidin, dê ji bo gelê Amedê û bi taybetî jî ji bo jinên Amedê bibe pêngaveke pêşveçûnê ya gelekî mezin.”
