Hevberdevka HDKê ya Stenbolê Dîdem Yilmaz têkildarî banga Rêberê Gêlê Kurd Abdullah Ocalan a iro diyar kir ku peyama bangê hemwelatîbûna azad û avakirina Komara Demokratîk bû û got: “Abdullah Ocalan bang li dewletê dike û dibêje ‘berpirsiyariya xwe bicih bîne.” Hevseroka DEM Partiyê ya Stenbolê Arîfe Çinar jî da zanîn ku peyam ser banga hemwelatîbûna azad û avakirina Komara Demokratîk bû.
Rêberê gelê Kurd Abdullah Ocalan di 27ê Sibata 2025an de bangawaziya “Aştî û Civaka Demokratîk kiribû. Di salvegera bangawaziya 27ê Sibatê de peyemeke nû ya Abdullah Ocalan hat parvekirin.
Hevseroka DEM Partiyê ya Stenbolê Arîfe Çinar û Hevberdevka HDKê ya Stenbolê Dîdem Yilmaz têkildarî peyama nû ya Rêberê Gelê Kurd Abdullah Ocalan axivîn.
‘Ji tundiyê tîne rêya aştiyê’
Hevseroka DEM Partiyê ya Stenbolê Arîfe Çinar diyar kir ku di salvegera 27ê Sibatê de birêz Abdullah Ocalan bangwaziya xwe nûkir û ev tişt anî ziman: “Israra birêz Abdullah Ocalan ya ji bo çareserkirina pirsgirêka Kurd gelek girîng e. Birêz Abdullah Ocalan pirsgirêkê ji rêya tundiyê tîne rêya rêya aştiyê. Ev bang ji bo pêkanîna ‘Civaka Demokratîk’ pêk hat. Di peyamê de pêdiviya pêşketina siyaseta demokratîk û jiholêrakirina zemîna pevçûnê hat datîn. Ev jî bi hemwelatiya azad dê pêk were. Ev peyam banga hemwelatîbûna azad û avakirina Komara Demokratîk bû.”
‘Divê hişmendiyê de jî çek were berdan’
Hevberdevka Kongreya Demokratîk a Gelan (HDK) a Stenbolê Dîdem Yilmazê jî bi bîr xist ku di salvegera 27ê Sibatê de peyameke nû ya Rêberê Gelê Kurd Abdullah Ocalan hat parvekirin û wiha axivî: “Birêz Abdullah Ocalan di peyama xwe ya nû de jî bang li her kesî kir ku her kes bi berpirsiyariyên xwe pêk bîne. Em wek HDK vê bangê erênî dibînin. Di vê peyama nû de hat gotin ku ‘Divê dewlet gavan bavêje.’ Di peyamê de tê gotin ‘çek berden ne tenê bi fiîliye, di hişmendiyê de jî pêk tê.’ Ev gotin gelek girîng e, di bingeha wê de tê gotin ‘ev ne gavekî jirêzê ye.’ Çek di hişmendiyê de jî tê berdan. Ji ber wê jî birêz Abdullah Ocalan bang li dewletê dike û dibêje ‘berpirsiyariya xwe bicih bîne.’ Ev bang berî salakî jî hatibû dayîn û gotibû ‘Ev pêyam tenê ji aliyekê ve nayê meşandin.’ Heke pêvajoyek hebe ev jî bi tenê entegrasyona gelê Kurd pêk nayê. Divê tevahî pêkhateyên civakê tev li entegrasyonê bibin. Birêz Abdullah Ocalan di vê mijarê de jî parçeya herî girîng jinan dibîne. Birêz Abdullah Ocalan behsa zimanê serdemê dike û dibêje ‘divê zimanê serdeme were guherandin edî zimanê serdemê bibe zimanekî çêker.’ Em jî dizanin ku ev ziman dibe sedema perçiqandina komekî din.”
‘Berpirsiyarî dikevê li ser milê her kesê’
Di berdewama axaftina xwe de Dîdem Yilmaz destnîşan kir ku di bangê de li ser ‘hemwelatiyê’ hatiye sekinandin û axaftina xwe wiha bi dawî kir: “Hemwelatî divê ne tenê ji bo miletekê bibe, hemwelatîbûn ji bo tevahî gelan divê were binavkirin. Entegrasyona Demokratîk gelêkê di nava geleke din de helandin nîn e. Berovajî vê bi çand û nasnameya xwe di nav hev de divê bijîn. Birêz Abdullah Ocalan di peyama xwe de vê yekê eşkere kir. Peyama nû ya birêz Abdullah Ocalan di serdama nû de çi, dê çawa were kirin e. Birêz Abdullah Ocalan di nava avakirina inşaya pozitîf de jî 3 têgeh parve kirin. Ev jî Civaka Demokratîk, Entegrasyona Demokratîk û Lihevhatina Demokratîk in. Li vir jî berpirsiyarî dikevê li ser milê her kesê. Em wekî HDK dibejîn ku tevahî beşên civakê hewceyî pêvajoyekî wisa bû. Em xwedî bangawaziya 27ê Sibatê derketibûn. Îro jî di salvegera 27ê Sibatê de em xwedî li peyama nû jî derdikevin.”
