Êlih – Aktivîstên TJAyê ku li Êlihê çalakiyên 8ê Adarê li dar dixin bang li jinan kirin ku roja 8ê Adarê tev li mitîngê bibin û gotin: “Em dixwazin ew roj jin bi reng, tilîlî û bi dengê xwe beşdarî mitîngê bibin.”
Li Êlihê bi rojan e aktivîstên Tevgera Jinên Azad (TJA) li gelek gund, navçe û navenda Êlihê bênavber xebatên 8ê Adarê Roja Jinan a Cîhanê bi rê ve dibin. Aktivîstên TJAyê banga tevlibûna mitînga 8ê Adarê li jinan kirin.
Aktivîsta TJAyê Nûrten Uzumcu diyar kir ku ew 8ê Adarê weke her sal dê îsal jî dîsa li Kurdistan û Tirkiyeyê pîroz bikin û wiha got: “8ê Adarê ji bo me roja têkoşîn û berxwedanê ye û ji bo jinên Kurd rojeke taybet e. Heta ev hatiye vê astê û hatiye pîrozkirin jinan gelek bedelan daye. Lê bi taybetî jî jinên Kurd bêhtir bedelên giran didin. Em weke her sal ji bo ku 8ê Adarê bê pîrozkirin li gelek taxên Êlihê li gund û navçeyên wê digerin. Bi vê gerê em bi jinan re gelek didin û distînin. Em xebatên xwe bi çalakiyan û bi rêxistin kirinê bêhtir dibînin ku jin tê rêxistinkirin. Xebatên me weke perwerdehiyê û atolyeyan tê meşandin. Û bi yekê re pêvajoyek jî heye û sala wê jî qediya. Li ser vê pêvajoyê jî xebatên me hene. Me heta niha li pênc herêmên Êlihê û li 49 taxên wê yên navendî bi jinan re atolyeyan û 50 civînan li dar xistiye. Her wiha em ê di 7ê Adarê de mitîngekî li dar bixin, dîsa jî hefteyek li pêşiya me heye em ê dîsa bi jinan re bên gel hev. Bangewaziya me li hemû jinên Êlihê ye, di 7ê Adarê de saet di 13:00an de li Dortyholê em ê mitînga xwe li dar bixin. Em dixwazin ew roj jin bi reng, tilîlî û bi dengê xwe beşdarî mitîngê bibin.”
‘Roja serhildanê, azadî û aştiyê ye’
Aktivîsta TJAyê Şukran Tay jî anî ziman ku 8ê Adarê ji bo jinan gelek girîng e û got ku roja serhildanê, azadî û aştiyê ye û wiha axivî: “Em weke jinên Êlihê bi rojan e, di kar û xebatan de ne. Niha ji bo ku xebat bêne meşandin em li parkan e û çalakiyan li dar dixin, da ku jin bêne beşdarî çalakiyan bibin. Em 8ê Adarê li jinên Rojava û li jinên her aliyên Kurdistanê jî pîroz dikin. Û bi vê mebestê em wê rojê li jinên hemû cîhanê jî pîroz dikim.”
‘Tevî hemû astengî û tundiyan jî dîsa jin li ber xwe didin’
Aktivîsta TJAyê Fatma Tan jî qala 8ê Adarê kir û got ew roj ji bo wan rojeke gelek girîng û bi wate ye. Tan bi bîr xist ku her sal ew beriya 8ê Adarê li taxan digerin û xebatan xwe didin meşandin û got: “Em dixwazin çalakiyên 8ê Adarê bi girseyî bên lidarxistin. Ez dixwazim hemû jinên cihanê û yên Êlihê wê rojê di nava pîrozbahiyan de cih bigirin. Bi salan e ku qetlîamên mezin li ser jinan tên kirin. Tevî hemû astengî û tundiyan jî dîsa jin li ber xwe didin. Em jin tim ji bo ku pêşî li van bûyeran bigirin hewldanên me hene.”
‘Kuştina jinan dilê me diêşîne’
Aktivîsta TJAyê Lamîa Ektî jî 8ê Adarê li dayik û li jinên di girtîgehan dîl tên girtin pîroz kir û wiha got: “Em bang li hemû jinan dikin ku ew roj her kes qadê tijî bike û roja xwe pîroz bikin. Her roja diçe tundiya li ser jinan zêde dibe. Lê mixabin jin çiqas jî li ber xwe didin roja dinê dîsa jî jinekê tê qetilkirin. Em dixwazin ji bo ku pêşî li van qetlîamên jinan bê girtin, her kes piştgirî bide van çalakiyan. Ne ji jinan û ji dayikan be kes nikare karekî jî bike. Bi qetlîamên jinan dilê me diêşê. Dîsa em bi dil û can xebatên xwe dikin. Em dixwazin li dijî kuştina jinan her kes tev li mitînga me bibe.”
