Li navçeya Bismilê jinan di çarçoveya çalakiyên 8ê Adarê de meş li dar xistin û piştî meşê daxuyanî hat dayîn. Di daxuyaniyê de hate destnîşankirin ku dê maf, ked û nasnameya jinan bê parastin.
Bi pêşengiya Meclîsa Jinan a Partiya Herêmên Demokratîk (DBP) û DEM Partiyê di çarçoveya çalakiyên 8ê Adarê Roja Jinên Cihanê de li navçeya Bismilê ya Amedê jinan meş li dar xist. Hevseroka Giştî ya DBPê Çîgdem Kiliçgun Uçar û gelek jin jî tev li meşê bûn.
Meşa jinan ji Parka Kardeşlîkê bi dirûşme û tilîliyan dest pê kir. Di meşê de pankatên “Bi jina azad rêber bi civaka demokratîk ve”, “ Nûjîn piştgirî ked û tekoşîna jinan dihûnîne” hatin vekirin û dowizên “Em tu carî dest ji azadî û têkoşîna xwe ber nadin”, “Em jin aştî û wekheviyê dixwazin”, “Em dê kesek din jî kêm nebin”, “Li hember tundiya mêran bijî hevgirtina jinan”û “Jin jiyan e, jiyan nekûje”, “Em dev ji azadî û têkoşîna xwe bernadin”, “Li dijî tundiyê bêdeng nemine” û “li dijî tundiya mêran bijî piştgiriya jinan” hate rakirin. Dirûşmên wek, “Jin, jiyan, azadî”, “Bijî 8ê Adarê”, “Bê Serok jiyan nabe”, “Jin, jiyan, azadî; azad bike Rêbertî” hatin berzkirin. Mêş bi tilîlî, erbane, çepikan berdewam kir. Meşa girseyê li ber Mizgefta Akpinarê bi dawî bû. Piştî meşê daxuyanî hate dayîn.
‘Her derê têkoşîn û berxwedana xwe bidomînin’
Aktivîsta TJAyê Emîne Caynak pêşî axivî û anî ziman ku ew bi saya jinên berxwedêr ên Kurd gihîhiştine van rojan û got: “Hûn dê her tim ronahiya jiyana me bin. Tundî û komkûjiya ku li dijî jinan tê meşandin kir û bi lêv kir ku li hember vê yekê li her derê têkoşîn û berxwedana xwe bidomînin. Bi tekoşîna jinên Kurd ên berxwedêr jin dengê xwe digihînin hemu cîhanê.”
‘Em ê mafê jiyanê, keda jinan û nasnameya wan biparêzin’
Hevşaredara Bismilê Mizgîn Ekîn pêşî 8ê Adarê li jinan pîroz kir û wiha got: “Îro em li vir in da ku em ê li hember tu zextan serî netewînin. Jin bi sedan sal in ku têdikoşin û daxwaza mafên xwe dikin. Ev têkoşîn ne tenê ji bo jinan e, lê ji bo her kesê ku edalet û demokrasiyê dixwaze ye. Berxwedan bîranîna herî mezin a jinan e. Hevgirtin hêza herî mezin a jinan e. Em ê mafê jiyanê, keda jinan û nasnameya wan diparêzin. Em ê têkoşîna xwe ji bo civakek wekhev û demokratîk bidomînin.”
‘Werin em Rojava bi bîr bînin ku jinan li dijî çeteyên DAIŞê şer kirin’
Hevseroka Giştî ya DBPê Çîgdem Kiliçgun Uçar jî axivî û detnîşan kir ku sala borî 400 jin hatine kuştin, tenê di meha Çile de 22 jin hatine kuştin û 15 jin wekî “mirinên gumanbar” hatine tomarkirin. Çîgdem Kiliçgun Uçar axaftina xwe wiha domand: “Li Bismilê Evîn Demîrtaş û Gurbet Yalçinkaya ji aliyê kesên herî nêzî wan ve hatin qetilkirin. Herî dawî li Bismilê keçek 15 salî întîxar kir. Ji kengî ve zarok li vî welatî întîxar dikin. Ji wê demê ve kuştinên jinan ewqas normal bûne. Werin em nîşan bidin ka jinên Kurd çawa xwe azad kirin. Jinên Êzidî bi parastina xwe azadiya xwe bi dest xistin. Werin em Rojava bi bîr bînin ku jinan li dijî çeteyên DAIŞê şer kirin. Jinên Kurd xwedî têkoşînek in ku pê serbilind in, têkoşînek ku kok di ziman, çand û dîroka wan de ye; tiştê ku ew hewce ne ku berfireh bikin ev têkoşîn e. Jinên Kurd wê vê têkoşînê li malên xwe, li kolanan û di nav partiyên xwe de berfireh bikin.”
Piştî axaftinan çalakî bi berzkirina dirûşmeyan bi dawî bû.
