Çewlig – Xelkê gundê Qerqebazarê yê navçeya Kanîreşê li dijî projeya JESê ya fîrmayeke Îngilîz radibin. Gundiyan diyar kir ku destûra ji wan nehatiye girtin û ew ê heta dawiyê axa xwe li dijî vê projeyê biparêzin.
Li navçeya Kanireşê ya Çewligê, şêniyên herêmê li dijî projeyên Santralên Enerjiya Jeotermal (JES) û avakirina polîganan nerazîbûna xwe nîşan didin. Niha jî gundê Qerqebazarê yê ser bi navçeya Kanîreşê ve di hedefa JESê de ye. Welatiyên gund diyar kirin ku ev proje dê bibin sedema wêrankirina xwezayê û dawî li sewalkariyê bînin. Projeyên ku bi navê “enerjiyê” li ser zeviyên çandiniyê û mêrgan tên plankirin, rastî nerazîbûna tund a xelkê herêmê tên. Şêniyên Kanîreşê destnîşan dikin ku parastina sirûştê, parastina rûmet û siberoja wan e.
‘Me îmze kom kirin, em ê destûrê nedin’
Yek ji şêniyên gund Yasîn Ozagan, destnîşan kir ku ew wek gundî li dijî vê projeyê li hev civiyane û wiha got: “Em naxwazin JES li gundê me çêbibe. Em çiya û erdên xwe nadin wan. Me îmze kom kirin û em ê berxwedana xwe berdewam bikin. Heya niha tu rayedar nehatine û destûra me negirtine. Derstûra me tune ye û em ê destûrê nedin ku ev fîrmaya Îngilîz li vir bixebite. Em bang li her kesî dikin ku alîkariya me bikin.”
‘Proje li ser xeta fayê ye’
Şêniyê gund Mihemed Armancî jî bal kişand ser xetereya erdhejê û bandora li ser sewalkariyê û diyar kir ku herêm navenda sewalkariyê ye û wiha axivî: “Ev proje dê bibe sedem ku mirov ji gundên xwe koç bikin. Gundê me bi kaniyên xwe û bi cotkariya xwe tê naskirin, tenê li gundê me 10 hezar pez hene. Li aliyê din, xetên fayê yên Gimgimê û Çewligê li vir digihêjin hev. Dixwazin li ser xeta fayê sontajê bikin. Dema hatin vir, em xapandin, yekê negot ku ji bo JESê ye. Me di destpêkê de alîkariya wan kir, lê derket holê ku armanca wan xirabkirina xwezaya me ye.”
