Bandora şerê Îsraîl û Îranê li ser rageşiya li Libnanê zêde dibe. Êrişên esmanî û amadekariyên ketina bejahî ya Îsraîlê dibe sedema zêdebûna gengaşiya di navbera Hizbûllah û Hikûmeta Libnanê de.
Bi berfirehbûna şerê di navbera Îsraîl, DYA û Îranê de rageşiya li herêmê û bi taybetî pevçûnên li Libnanê jî kûr dibin. Hêzên Îsraîlê êrîşên asmanî li gelek deverên Libnanê pêk anîn û hin yekîneyên leşkerî jî ketin başûrê Libnanê. Ev pêşketina bû sedema zêdebûna rageşiya di navbera pêkhateyên Libnanê de.
Hêzên Îsraîl ketin başûrê Libnanê
Li gorî agahiyan, piştî vekişiyana artêşa Libnanê, hêzên Îsraîlê di bin êrîşên asmanî de dest bi pêşketina bejahî kir û di nav axa başûrê Libnanê de pêş ket. Hêzên IDF ragihandin ku ew li herêmê “pozîsyonên parastinê” saz dikin da ku pêşiya êrîşên Hizbullahê bigirin. Rayedarên leşkerî yên Îsraîl jî diyar kirin ku di çarçoveya van operasyonan de gelek noqteyên Hizbullahê yên li başûrê Libnanê hedef girtine û derbeyên giran li Hizbûllahê xistine.
Hikûmet vekişiya, aşîrên Şiî bêalîtiya xwe aşkera kir
Li ser hişyariya Îsraîlê ya operasyona bejahî artêşa Libnanê nêzî deh kîlometre ji ser sînorê başûrê welat paşve vekişiya. Her wiha du eşîrên herî mezin ên Şiî yên li başûrê Libnanê jî ragihandin ku ligel biryara Hikûmeta Libnanê ne û li dijî şerek nû li herêmê derdikevin. Li ser paşvekişiyana artêşa Libnanê, Hizbûllahê ev yek wekî teslîmiyetê pênase kir û daxuyand ku dê li dijî vê rewşê rawestin. Ji başûrê Libnanê hind fûze ber bi Îsraîlê ve hatin avêtin.
Hikûmeta Libnanê ji Hizbûllahê xwest çekan radest bike
Li ser helwesta Hizbûllahê, Hikûmeta Libnanê qedexe kir ku ji bilî artêşê tu hêz çek bikar bînin û bang li endamên Hizbûllahê jî kir ku demildest çekên xwe teslîmî artêşê bikin. Bes ev daxwaza Hikûmeta Libnanê jî ji hêla Hizbûllahê ve hate redkirin. Daxuyaniyên du alî bû sedema zêdebûna rageşiya di navbera Hikûmeta Libnanê û Hizbûllahê û pêk hateyên li vî welatî.
‘Divê êriş bêyî biryara Hikûmetê pêk neyên’
Rayedarên Libnanê vekişiyana xwe wekî, ‘veguhastina hêzan’ pênase kir û daxuyandin ku armanca wan ew e ku hêzên leşkerî ji nûve bi cih bikin. Hikûmeta êrişên Hizbûllahe yên li dijî Îsraîlê jî rexne kirin û xwest ku otorîteya Hikûmetê bê naskirin. Serokwezîr Nawaf Salam êrîşên moşekî yên Hizbullahê rexne kir û got ku tu çalakiyeke leşkerî divê bêyî biryara dewletê pêk neyê.
Piştî civîna awarte ya kabîneyê, Hikûmeta Libnanê ragihand ku hemû çalakiyên leşkerî yên Hizbullahê hatine qedexekirin û daxwaz kir ku çekên xwe radestî dewletê bikin. Hizbullahê jî di daxuyaniyekê de ev biryar rexne kir û got ku êrîşên wan ‘bersiva êrişên Îsraîlê ne’ û ji bo parastina axa Libnanê pêk hatine.
Bi dehan kesan jiyana xwe ji dest da
Li gorî raporên rêxistinên navneteweyî heta niha di encama êrîşên dawî de bi dehan kesar li Libnanê jiyana xwe ji dest dane û bi sedan kes jî birîndar bûne. Her wiha gelek avahî hilweşiyane, ziyanên madî û binesaziyê deketine holê.
