Şaxa Egîtîm Sena Sêrtê li dijî tundiya ku li dibistanan li dijî mamosteyan tê kirin daxuyanî da û got: “Daxwaza lêpirsîna îdarî ya ku me li dijî şêwaza rêveberî û zexta sîstematîk a Dibistana Serlêdana Perwerdehiya Taybet a Sêrtê li dijî mamosteyan kir, mixabin li Lijneya Teftişê bê encam ma.”
Şaxa Egîtîm Sena Sêrtê ji bo şermezarkirina kiryar, tundî û gotinên zayendî yên ku midûrê Dibistana Serlêdana Perwerdehiya Taybet a Sêrtê li dijî memosteyên jin û şagirtan kiribû li pêşiya avahiya Navenda Perwerdehiya Miduriyeta Sêrtê daxuyanî da. Gelek mamoste û endamên Egîtîm Senê, Şaxa ÎHDa Sêrtê, rêvereberên DEM Partiyê û gelek kes beşdarî daxuyaniyê bûn. Di çalakiyê de bênavber dirûşmeya “Kes nikare mamosteyan bêdeng bike” hat berzkirin. Di çalakiyê de pankarta ku li serê “Cihê ku liyaqat lê tune be, edalet jî tune ye” û “Me li ber lêpirsînên û surgûnên we serî daneyniye û em ê daneynin” hat hilgirtin.
Sekreterê Giştî yê Egîtîm Senê Zulkuf Uçar beriya daxuyaniyê axivî. Uçar bang li rayedaran kir û got: “Berprisyarê van kiryarên ku li dibistanan têne kirin rayedarên dewletê bi xwe ne û divê mudaxeleyê van pirsgirêkan bê kirin. Divê Wezareta Polîtîkayên Civakî û Malbatî êdî ew jî ji vê rewşa bûdengiyê derxin û li dijî van kiryaran bibin bersiv û careke din neyên jiyîn. Em careke din li vir bang dikin ku êdî kiryarên wisa li dibistanan neyên jiyîn.”
Metna daxuyaniyê jî ji aliyê rêveberê Şaxa Egîtîm Sena Sêrtê Suleyman Aksal ve hate xwendin. Aksal diyar kir serlêdana wan a li dijî midûrê dibistanê bêencam ma û wiha got: “Di dosyaya lêpirsînê de endamên Lijneya Teftişê raporên li gorî midûrê dibistanê amade kirine. Kesê ku dosyaya wî bi vî rengî hat paqijkirin, hat xelatkirin û wekî midûrê heman dibistanê hat tayînkirin. Ev rewş delîlek aşkera ye ku endamên Egîtîm Sen bi sirgûnkirinê têne cezakirin. Em ê li hember vê hişmendiya ku rûmeta mirovan paşguh dike bêdeng neminin. Heta ku edalet pêk were em ê ji têkoşîna xwe gavekê paşve neavêjin. Ew kesên ku dixwazin xebatkarên perwerdehiyê bitirsînin divê bizanibin ku dîwarên tirsê yên ku we çêkirine bêguman dê li pêşberî vê têkoşîna bi rûmet hilweşin.”
