Dayikên Şemiyê di hefteya 1034emîn de xwestin faîlên Abdullah Canan bên dîtin û gotin: “Heta aqûbeta hemû windayan bê eşkerekirin wê lêgerîna me ya edaletê berdewam bike.”
Dayikên Şemiyê/Mirovên Şemiyê di hefteya 1034emîn de li Qada Galatasarayê civiyan û li aqûbeta windayan pirsîn û xwestin faîl bên darizandin û cezakirin. Dayikên Şemiyê vê hefteyê li aqûbeta Abdullah Canan pirsîn. Daxuyaniya vê heftê ji hêla Seroka Komeleya Mafên Mirovan (ÎHD) a Şaxa Stenbolê Gulseren Yolerî ve hat xwendin.
Fermandar gef lê xwariye
Gulseren Yolerî anî ziman ku Abdullah Canan û malbata wî ji ber binpêkirina mafan ên li Colemêrgê serî li dozgeriyê dane û wiha got: “Di serlêdana ku tevî 7 xizmên xwe re kirin de derbarê Fermandarê Tabûra Komando ya Çiyayê Geverê Mehmet Emîn Yurdakul de serlêdana sûc kirin. Li ser vê yekê Mehmet Emîn Yurdakul bang li Abdullah Canan û du kesên ku gilî kirine kir. Ji wan xwest ku giliyên xwe yên derbarê wî de biterikînin. Dema Abdullah Canan got ku ew dev ji giliyê xwe bernadin, li ber çavê şahidan ji aliyê Mehmet Emîn Yurdakul ve gef lê hat xwarin.”
Di sala 1996an de hat binçavkirin
Gulseren Yolerî diyar kir ku piştî ku Mehmet Emîn Yurdakul gef li Abdullah Canan xwar di 17ê Çileya 1996an de li ser rêya Gever-Wanê wesayîta wî ji aliyê leşkeran ve hate rawestandin û hat binçavkirin û got: “Malbata Canan bang li hemû rayedarên herêmî û neteweyî kir û xwest Abdullah Canan bê dîtin. Lê binçavkirina wî hat redkirin. Di 21ê Sibata 1996an de cenazeyê Abdullah Canan ku îşkenceya dijwar lê hatibû kirin, ji aliyê gundiyan ve hat dîtin. Abdullah Canan bi 7 guleyên ku ji nêz ve lê hatibûn reşandin jiyana xwe ji dest da. Dest, ling û devê wî girêdayî li ser rêya Geverê-Bajêrgehê hat dîtin.”
Li qereqolê îşkenceya dijwar lê hatiye kirin
Gulseren Yolerî anî ziman ku îtîrafkar Kahraman Bîlgiç ê ku piştre di tabûra Geverê de wezîfedar bû, diyar kir ku Abdullah Canan di tabûrê de bi îşkenceyê îfadeyên wî hatine girtin û got: “Bi berfirehî diyar kir ku ji aliyê Serpel Nîhat Yîgîter ve bi talîmata Fermandarê Tabûra Komando ya Çiyayê Geverê Mehmet Emîn Yurdakul hat qetilkirin. Albay Kamber Ogur jî da zanîn ku di meha sibatê de li revîra tabûrê Abdullah Canan ê ku binçavkirina wî hat redkirin, serê wî pêçayî ye dîtiye.”
Têkoşîna hiqûqî ya malbatê
Gulseren Yolerî bal kişand ser encama hewldanên hiqûqî yên malbata Abdullah Canan û wiha got: “Ji aliyê Dozgeriya Dadgeha Ewlehiya Dewletê (DGM) ve derbarê Kahraman Bilgiç, Mehmet Emîn Yurdakul, Nîhat Yîgîter û Bulent Yetût de lêpirsîn hat vekirin. Dadgeha Mafên Mirovan a Ewropayê (DMME) a ku malbata Canan di sala 1997an de serî lê da, di 26ê Hezîrana 2007an de encamnameya dozê eşkere kir. Dadgeha 3yemîn a DMMEyê got, ‘Wekî ku ji îfadeyên şahidan jî tê dîtin ku di nava wan de leşker jî hene, Abdullah Canan di binçavan de hatiye qetilkirin. Canan beriya ku bê kuştin îşkenceya giran lê hatiye kirin’. Nêzîkatiya Tirkiyeyê ya di hiqûqa navxweyî de sosret nirxand û bi yekdengî biryar da ku mafê jiyanê ji aliyê madî û rêbazê ve hatiye binpêkirin.
‘Em ê dest ji lêgerîna edaletê bernedin’
Gulseren Yolerî diyar kir ku heta aqûbeta hemû windayan zelal nebe û faîl bên darizandin û cezakirin, wê lêgerîna xwe ya edaletê bidomînin û wiha dawî li axaftina xwe anî: “Çiqas sal derbas bibin jî em ê dev ji daxwaza edaletê ya ji bo Abdullah Canan û hemû windayan bernedin, em carek din hemû windahiyên xwe bi bîr tînin. Divê dewlet li gorî pîvanên hiqûqa gerdûnî tevbigere.”
Piştî daxuyaniyê li çalakvanan qerenfîl danîn Qada Galatasarayê û çalakî bi dawî bû.
