Amed – Serokê Baroya Amedê Tahîr Elçî di salvegera 9’emîn a qetilkirina xwe de li ber Minareya Çar Ling hat bibîranîn. Hat diyarkirin ku wê xwedî li gotin û helwesta Elçî bê derketin.
Baroya Amedê û Weqfa Tahîr Elçî ji bo salvegera 9emîn a qetilkirina Tahîr Elçî bernameya bîranînê li dar xist. Parêzer û serokên baroyan û siyasetmedar li ber Edliyeya Amedê kom bûn.
Serokê Yekitiya Baroyên Tirkiyeyê (TBB) Erînç Sagkan, Berdevka DEM Partiyê Ayşegul Dogan, Hevşaredara Bajarê Mezin a Amedê Serra Bucak, Parlamenterê CHP’ê Sezgîn Tanrikulu, serokên baroyên gelek bajaran, bi sedan parêzer li ber Edliyeya Amedê dest bi meşê kirin. Girse li pişt pankarta “Em te ji bîr nakin” meş hat lidarxistin û dirûşma “Tahîr Elçî rûmeta me ye” û “Şehîd namirin” hatin berzkirin.
Meş li ber Minareya Çar Ling ku Tahîr Elçî lê hat qetilkirin bi dawî bû. Ewilî li dengê Tahîr Elçî yanî li axaftina wî ya dawî ya li ber Minareya Çar Ling hat guhdarkirin.
‘Em xwedî li helwesta Tahîr Elçî derdikevin’
Paşê daxuyanî hat dayîn. Serokê Baroya Amedê Abdulkadîr Guleç daxuyanî da û destpêkê bal kişand ser bêhiqûqiyên di doza Tahîr Elçî de qewimîn. Guleç da zanîn ku daxwazên kifşê hatin redkirin û got: “Rastiyên suîqestê li cem serdestan hatin veşartin. Wezîran û Serokwezîr gotin em ê nehêlin ev cînayet di tariyê de bimîne. Lê me xapandin. Cînayeta Tahîr Elçî bû destpêka serdemek tarî. Ji wê rojê heta îro serdestiya hiqûqê xesarek mezin dîtiye. Baweriya civakê ya bi edaletê nemaye. Krîza siyasî ji wê rojê heta îro berdewam dike. Serokê me Tahîr Elçî ji bo çareseriya aştiyane û demokratîk a pirsgirêka kurd hewl dida. Em xwedî il gotin û helwesta serokê xwe yê ebedî Tahîr Elçî derdikevin. Ji bo cînayeta wî were ronîkirin çi ji destê me were em ê bikin û têkoşîna xwe bidomînin. Em carek serokê xwe yê nemir bi rêzdarî û minet bi bîr tînin.”
Piştre hevjîna Tahîr Elçî, Turkan Elçî û Serokê TBB’ê Erînç Sağkan axivîn û Tahîr Elçî bibîr anîn.
Piştî axaftinan hiqûqzanan û siyasetmedaran qerenfîl danîn ber Minareya Çar Ling û bîranîna bi dawî bû.
Navê Tahîr Elçî li kuçeya Minareya Çar Ling hat kirin
Li cihê bîranînê hat ragihandin ku Şaredariya Bajarê Mezin a Amedê û Şaredariya Sûrê navê Tahîr Elçî li kuçeya Minareya Çar Ling kirin. Dê sibê bi beşdariya hevşaredaran û Baroya Amedê ji bo vekirina kûçeyê merasîmek bê lidarxistin.
