Bi dirêjbûna şerê DYA-Îsraîl û Îranê re hejmara mirî û birîndaran jî zêde dibe. Li gorî daneyan aliyan di 19 rojên şer de ji aliyê Îran û Libnanê ve 4 hezar 11 kesan jiyana xwe ji dest da û 12 hezar 500 kes jî birîndar bûn. Ji aliyê Îsraî û Amerîkayê jî 25 kes mirin û 390 kes jî birîndar bûne.
Şerê Îsraîl-DYA û Îranê di roja 19an de berdewam dike. Bi dirêjbûna şer re hejmara qurbaniyan jî zêde dibe. Lê ji sedî 95ê qurbaniyan ji aliyê Îran û Libnanê ve çê dibe. Li gorî daxuyaniyên Heyva Sor a Îranê di 19 rojên şer de li Îranê 3 hezar 99 kesan jiyana xwe ji dest dane û qasî hatiye tespîtkirin zêdeyî 10 hezar kesî jî birîndar bûne. Li gorî saziyê hejmara gelek birîndaran giran e û kesên ku ji ber rewşe şer tespît nekirîn jî hene.
Li Libnanê 912 kes hatin kuştin
Li gorî daneyan li Libnanê jî encamên şer hindî diçe zêdetir giran dibe. Li gorî saziyên navneteweyî û yên Libnanê heta niha di encama êrişan de 912 kesan jiyana xwe ji dest dane û nêzî 2 hezar 500 kes jî birîndar bûne.
Li Îsraîlê 12 mirî
Di pêvajoya şer de ligel êrişên moşekî û dronên xwekujî jî hejmara kesên jiyana xwe ji dest dayîn di asta herî jêr de ye. Li gorî daneyên Hêzên Parastina Îsraîlê (IDF) ragihandîn heta niha 12 kesan jiyana xwe ji dest dane û 205 kes jî birîndar bûne.
DYA: 13 leşker mirin 190 birîndar
Li gorî daneyên Wezareta Kar a DYAyê aşkera kirîn heta niha di şer de 13 leşkerên Amerîkî jiyana xwe ji dest dane. Ji van 7 leşker li encama ketina balefireh şer a ku bi xeletî ji hêla Kûwêtê ve hate xistin jiyana xwe ji dest dane û 5 leşker jî di encama êrişên Îranê de mirine. Her wiha Wezareta Şer a Amerîkayê ragihand ku li cihên cuda 190 leşkerên wan jî birîndar bûne. Hate ragihandin ku ji van leşkeran 180 piştî tedawiyê vegeriyane ser karê xwe lê rewşa 10 ji wan cidiyeta xwe diparêze.
Derbarê mirî û birîndarên li welatên bûne hedefa Îranê yên wekî Kurdistana Federal, Iraq, Qetar, Siûdî Erebistanê û deverên din de agahiyek zelal nehatiye daxuyandin.
