Amed – Sibê li Cejna Remezanê ye. Ji bo cejnê welatiyên li Amedê dijîn berê xwe dan sûk û bazaran. Welatiyan destnîşan kirin ku ji ber krîza aboriyê nikarin weke berê pêdiviyên xwe yên cejnê bistînin û gotin: “Êdî em bi dilê xwe nikarin tiştekê bistînin.”
Li Amedê ji bo Cejna Remezanê liv û tevgereke zêde li sûk û bazaran heye. Lê belê ev liv û tevger ji ber krîza aboriyê ya zêde û bihabûna pêdiviyan, ji kêfxweşiyê zêdetir cihê xwe ji fikar û xemgîniyê re hiştiye. Hemwelatiyên ku ji bo kirîna pêdiviyên cejnê derketin sûk û bazaran, bal kişandin ser zêdebûna enflasyonê û diyar kirin ku ji ber giraniyê ew nikarin tiştekî bikirin.
‘Em ne bi dilê xwe, li gorî berîka xwe distînin’
Hemwelatiyên Amedê destnîşan kirin ku nikarin tiştên bi dilê xwe bistînin û anîn ziman ku ew neçarin li gorî aboriya xwe tevbigerin. Jinên ku li sûkê me mîkrofon dirêjî wan kir jî diyar kirin ku ew tenê dikarin pêdiviyên herî lezgîn û mecbûrî bistînin û wiha axivîn: “Çi lazimiya malê hebe, em mecbûr in tenê wê bistînin. Em û hevserên xwe derdikevin sûkê; em xwarin û pêdiviyên malê distînin. Bi qasî ku heye em her tiştî dikarin ji xwe re bistînin û heke têr neke jî em îdare dikin. Êdî em bi dilê xwe nikarin tiştekê bistînin.”
‘Her tişt di dilê me de ma’
Welatiyan bal kişandin ser bihabûna zêde ya li bazaran û nerazîbûna xwe ya li dijî krîza aboriyê wiha anîn ziman: “Her tişt di dilê me de ma. Her tişt biha ye. Me tenê ji zarokên xwe re cilên herî erzan stendine. Berê me tişta ku dixwest distend, me cilên baş distendin û me mesrefa malê hemû peyda dikir. Lê em niha nikarin. Her tişt pir biha bûye; merîv nikare tiştekî baş bistîne. Li ser cadeyê merîv dibîne qey erzan e. Lê gava meriv destê xwe diavêjiyê; dibêjin du, sê, pênc hezar e û tiştekî baş jî nîne. Her tişt wisa biha bûye ku êdî kes nikare tiştekê bistîne.”
