Amed – Endamên Însîyatîfa Yekîtiya Demokratîk Nevzat Ozgen û Mehmet Emîn Turk derheqê Yekitiya Neteweyî ya Kurd de axivîn û wiha gotin: “Divê gelê Kurd di Şerê Sêyemîn ê Cihanê de yekitiya xwe ava bike.”
Di 19ê Adarê de bi îmzeya zêdetirî 200 kesayetên cûda yên Başûrê Kurdistanê ji bo yekitiya Kurdan bi dirûşma ‘Yek e yek e yek e, gelê Kurd yek e’ projeya “Lihevkirina Neteweyî” hate destpêkirin. Roj bi roj piştgiriya kesayet, sazî, rêxistin û partiyan ji bo vê pêngava yekitiya neteweyî zêde dibe. Înîsiyatîfa Yekîtiya Demokratîk jî ji bo piştevaniyê duh li ber avahiya Komeleya Aştiya Civakî û Guftûgoyê (TOD-DER) ya li navçeya Rezan a Amedê daxuyanî da çapemeniyê û destnîşan kir ku ji bo Kurd serbikevin divê yekîtiya xwe ava bikin. Endamên Însîyatîfa Yekîtiya Demokratîk Nevzat Ozgen û Mehmet Emîn Turk têkildarî yekîtiya neteweyî ji ajansa me re axivîn.
‘Nekarîn li ser welatê me serwer bin’
Mehmet Emîn Turk anî ziman ku ev demeke dirêj e ku di nav dagirkeriyê de dijîn û derbarê mijarê de wiha got: “Lê ev parçebûna polîtîkaya Anglo-Sakson e. Mesela em bêjin di serê sed sala bîstan de, welatê me bû çar perçe, polîtîkaya Anglo-Sakson çi ye? Pêşî ji hev veqetîne, dû re parçe bike û bi rê ve bibe. Niha heke welatê me yek bûbûya, nedikarîn li ser welatê me serweriya xwe çekiribûya, nekarîbûn li ser Rojhilata Navîn jî serweriya xwe çêkin, ji ber vê yekê ewilî welatê me ji hev veqetandin. Kirin çar perçe dû re bi rê ve birin. Bi rêvebirinê bes qîma xwe neanîn.”
‘Tenê bi gotina Kurd û Kurdistanê yekîtî ava nabe’
Mehmet Emîn Turk anî ziman ku niha gelek derdor neteweperestiyê weke fikreke nû, weke têgihiştineke nû raber dikin û wiha domand: “Wisa nîn e, neteweperestî bi xwe fikreke du sed, sê sed sal e li ser rûyê erdê serwer e. Neteweperestî li ser esasê xwe li ser civakekê din e, xwe li ser civakên din serwer dike. Bi vê têgihiştinê serweriya xwe rewa dike. Em bêjin di nav civakê de her gav perçebûn e, di nav civakê de her gav alozî ye, di nav civakê de berhevdaniyê bi xwe re tîne. Ji bo wê, em ne netewperestiyê em neteweya demokratîk diparêzin. Ewlehiya Kurdan wê çaxê misoger dibe. Wisa nebe em bêjin ewlehiya Kurdan jî misoger nabe. Xetereyên bi vî rengî jî hene. Tenê bi gotina ‘Kurd û Kurdistan’ nabe. Bi tenê bi bayê neteweperestiyê tu Kurd û Kurdistanê nikarî li ser piyan bihêlî. Kesên xêrnexwaz dikin ku ev baweriya gelan a ku bi hev re heye ji holê rakin.”
‘Divê gavên nû, gavên li hevkirinê bêne avêtin’
Nevzat Ozgen jî bi bîr xist ku şerê heyî, şerê cîhanê yê sêyemîn e û destnîşan kir ku divê Kurd jî li gorî vê yekê siyasetekê diyar bikin û ji bo demên pêş pêwîste stratejiyekê ava bikin. Nevzat Ozgen anî ziman ku divê gelê Kurd beriya her tiştî di nava xwe de yekîtiyê ava bikin û got: “Li Rojavayê Kurdistanê rewşeke cuda derketiye holê. Kurd ji nû ve dixwazin xwe bi rêxistin bikin. Hem Rojhilat hem Rojava hem bakurê Kurdistanê em dixwazin di nav wan de tekîliyeke germ û bi rêxistinî derkeve holê. Divê di vî warî de Kurd bibin xwedî statuyek, Kurd bibin xwedî nasnameyek û bibin xwedî saziyek. Ku di cîhanê da çawa ku gelên din tên naskirin, nasnameya wan cîhanê de tê qebûl kirin, em dixwazin Kurd jî wekî gelên din bêne naskirin. Divê kurd di nava xwe de wan tekîliyên xwe bi pêş ve bibin, têkîliyên xwe xurt bikin. Divê gelê Kurd rêbazên xwe di berçavan re derbas bikin. Dibe ku berê kêmasî çêbibin jî divê mirov li pêşeroja xwe binêre. Divê gavên nû, gavên li hevkirinê bêne avêtin.”
