Komîteya Lihevanînê û Rêveberiya Xweser a bajarê Kobanê du malbat piştî 14 salan ji pirsgirêkan li hev anîn. Fermandarê Giştî yê HSDê Mazlûm Ebdî axivî û wiha got: “Em bi hêvî ne hemû kes li hevdu werin û aramî li herêmê pêk were.”
Komîteya lihevanînê û Rêveberiya Xweser du malbatên ji gundê Cibnê û Aşmê ku ji 2012an de ji ber pirsgirêkan heta niha 5 kes hatibûn kuştin, li hev anîn.vKomîteya Lihevanînê û Rêveberiya Xweser a Kobanê ji bo lihevanîna her du malbatan li gundê Cibnê 6 kon vedan. Di kon de Fermandarê Giştî yê Hêzên Sûriya Demokratîk (HSD) Mazlûm Ebdî, Cîgirê Wezîrê Parastinê yê hikumeta demkî ya Sûriyeyê Sîpan Hemo, hejmareke zêde ji gelên bajarê Kobanê, rûspî û şêxên ereb, nûnerên Rêveberiya Xweser, rêxistinên jinan ên bajarê Kobanê, partiyên siyasî û nûnerên malbata gundê Cibnê amade bûn.
Merasîma lihevanînê bi deqeyek rêzgirtinê dest pê kir, Fermandarê Giştî yê HSDê Mazlûm Ebdî axivî û wiha got: “Em hemû kesên amade silav dikin. Em vê silhê Ii her kesî pîroz dikin. Em bi hêvî ne hemû kes li hevdu werin û aramî li herêmê pêk were. Tevahî bûyerên ku çêbidin bi rêya silhê pêk bên û êdî bûyerên bi vî rengî pêk neyên. Yeketiya civakan di van deman de ji her tiştî girîngtir e. Armanca me ew e ku li derdora xwe yekitiyekê çêbikin ku li ser asta Sûriyeyê xebatekê bimeşînin.”
Sîpan Hemo jî diyar kir ku ji aştiyê xweştir tişt tune ye û got: “Di vê qonaxa niha de divê aramî û ewlehî pêk were û gelê me yekitiya xwe xurt bikin. Em vê silha pîroz li her du malbatan û li gelê xwe pîroz dikin. Îro em vê rojê bi were re jiyan dikin em gelekî kêfxweş in.”
Hevserokê Meclisa Rêveberiya Xweser a Kobanê Fehan Hec Îsa jî anî ziman ku ew gav bi gav ber bi çareseriya ve diçin û anî ziman ku: “Em dikarin hemû pirsgirêkan çareser bikin û va ye ku em gihiştin vê astê ku me dikaribû pirsgirêka her du malbatan çareser bikin û wan li hev bînin. Ev in ên ku Kobanê temsîl dikin, em bi hêvî ne hemû malbat li hev werin ji bo ku gelê me di nava aramiyê de jiyan bikin.”
Rêveberê Meclîsa Lihevanînê ya Kobanê Siltan Hemîdî diyar kir ku gelê Kobanê bi berxwedana xwe mohra xwe li dîrokê xist û va ye careke din Kobanê mohra xwe li dîrokê dixe û got: “Weke tê zanîn ku jinê di dîrokê de rola edalet û aştî û wekheviyê dida meşandin û her tişt li derdora jinê bû. Lê careke din em wek jin dixwazin roleke sereke di nava civakê de bilîzin. Em dixwazin hemû pirsgirêkên navxweyî yên di nava civakê de çareser bibin û divê hemû gelê me destê xwe dirêjî aştî û çareseriyan bike.”
Bi navê Ol û Bawerî ya bajarê Kobanê Hec Mihemed Qaso destnîşan kir ku: “Em bi hêvî ne êdî tu pirsgirêkên malbatan dernekevin ji bo ku gel di nava aramiyê de bijîn.”
Bi navê malbata gundê Cibnê, Mehmûd Beşar û Şêx Bozan spasiya HSDê û Rêveberiya Xweser û hemû kesên amade kir û got ku ew vê lihevanînê diyarî cangoriyên azadiyê dikin û anî ziman ku ew aştî û wekehiyê dixwazin ne parçebûnê.
Di dawiyê de Mehmûd Beşar ku yê ji malbata gundê Cibnê wesîqa silhê xwend.
Wê sibê jî silha malbat gundê Aşmê li gundê Aşmê were lidarxistin.
