Li BKMa Êlihê nivîskar Onder Kirmizitaş danasîna pirtûka xwe ya bi navê “Bayê Evîna Ronyayê” kir.
Li Navenda Çandê ya Baharê (BKM) ya Êlihê bi moderatoriya lîstikvan Abdullah Tarhan, nivîskar Onder Kirmizitaş danasîna pirtûka xwe ya bi navê “Bayê Evîna Ronyayê” kir. Di danasîna pirtûka Onder Kirmizitaş de stranên denbêjiyê hatin gotin û helbest hatin xwendin. Her wiha gelek kesên ku bi wêjeya Kurdî re eleqedar dibin li eywana çandê bûn, denbêjî û xwendina helbestan guhdar kirin.
‘Heta niha çar heb pirtûkên min hatine weşandin’
Helbestvan û nivîskar Onder Kirmizitaş di danasînê de wiha axivî: “Pirtûka min a ‘Bayê Evîna Ronyayê’ Kurdekî evîndar hestên xwe yên evîndariyê aniye ziman. Li serê jî gelek lê hûr bûye û bi tenê maye. Dema ku bi tenê maye, xwe di naveroka helbestan de dîtiye û bi wî awayî xwe xurt kiriye. Her wiha li ser wê esasê li erdnîgariya Xerzanê û li her çar parçeyên Kurdistanê jî geriyaye. Li gelek metrapolan geriyaye û piştre çûye Ewropayê. Jiyana wî tim koçberî bûye û wisa hestên xwe ji evîna xwe re aniye ziman. Divê em Kurd bi her tim bi Kurdî binivîsin û divê em çand, ziman, huner û li kevneşopiyên bibin xwedî. Em jî bi salan di nava siyaseta Kurd de man lê her tim jiyana me bibû bi Tirkî, piştre min biryar da ku ez ê êdî bi Kurdî binivîsim û bixwînim. Heta niha çar heb pirtûkên min hatine weşandin. Her wiha çarên din jî amade ne, em ê di demên pêş de wan jî derxin. Ew jî hem roman in û hem jî çîrok di nava wan de hene. Nivîskarekî Kurd divê xwe li ser şopên Apê Mûsa, Seydayê Cegerxwîn, Mehmed Ûzûn û hwd. li ser şopa gelek kesên wisa bibînin. Ji bo çand û zimanê Kurdî çi tişta ku ji destê me bê em ê bikin.”
Bername bi xwendina helbestan, pirs û bersivan û bi îmzekirina pirtûkan bi dawî bû.
