Birayê Rêberê Gelê Kurd Abdullah Ocalan, Mehmet Ocalan bang tevlêbûna bernameyên festîfala bi boneya 4ê Nîsanê roja rojbûna Abdullah Ocalan tê lidarxistin kir û got: “Em berê li ber tunebûnê bûn, lê niha em bi saya Serok û hevalên wî ji tunebûnê hatin asta hebûnê.”
Bi boneya 4ê Nîsanê roja rojbûna Rêberê Gelê Kurd Abdûllah Ocalan çalakiyên cur bi cur tên lidarxistin. Pîrozbahiyên ku ji 1ê Nîsanê ve hatine destpêkirin 3 roj in bênavber bi bernameyên cur bi cur berdewam dikin. Li gelek bajarên bakurê Kurdistanê ji bo Rêberê Gelê Kurd Abdûllah Ocalan şitilên daran têne danîn. Di heman de jî li gelek navçeyên Rihayê bernameyên di çarçoveya festîvalê de tê lidarxistin.
‘Hebûn ji berxwe ve çênebû’
Welatiyên beşdarî festîvalê dibin xwe bi cil û bergên rengên kesk û sor û zer dixemilînin û bi girseyî rojbûna Abdullah Ocalan pîroz dikin. Şiyar û naveroka festîval û çalakiyên pêk tên daxwaza azadiya fîzîkî ya Abdullah Ocalan e. Di du rojên dawiyê yên festîvalê dê li gundê Amarayê yê girêdayê navçeya Xelfetiyê ya Rihayê jî çalakî û bernameyên cihê bên li darxistin. Birayê Abdullah Ocalan, Mehmet Ocalan, banga tevlibûna 4ê Nîsanê li gelê Kurd kir û got: “Em bi saya Serok Apo û hevalên wî ji tunebûnê bi çand, ziman û hunera kete hebûnê. Ev hebûn jî ji ber xwe ve çênebû, bi zor û zehmetî û bi bedelên gelek giran çêbû.”
‘Bila herkes li nirxan xwedî derkeve’
Mehmet Ocalan bi boneya hatina 4ê Nîsanê rojbûna Rêberê Gelê Kurd Abdûllah Ocalan bang li herkesî kir ku li Amarayê bin û wiha got: “Em bang li herkesî dikin ku tev li festîvalê bibe. Beriya ku ev têkoşîn bê destpêkirin me Kurdan her tiştên xwe ji bîr kiribû. Ev têkoşîn nebûya niha ev çanda û zimanê ji holê hatibû rakirin. Beriya 50 salî em ne di wê ferqa Kurdî bûnê de bûn. Lê tişta ku li dijî Kurdan tê kirin nayê qebûlkirin. Em bang li hemû heval û hogirên xwe dikin ku li van nirxan xwedî derkevin.”
‘Dûrketina ji ziman xetereyek mezin e’
Li ser nirxên têkoşînê afirandîn Mehme Ocalan anî ziman ku xwedî derketina van nirxan berpirsyariya herkesî ye û wiha pêde çû: “Îro Kurd û Kurdî hebûne. Lê gelek Kurdên me ji ziman û çanda xwe dûr ketine. Hevalên me yên nava kar û xebatan de jî bi piranî bi zimanê xwe naaxivin. Yên ku Kurd in û bi zimanê Kurdî naaxivin zêde bûne. Ev yek ji bo pêşeroja me Kurdan tişteke gelek xetere ye. Kurdekî ku ji bo ziman û hebûna xwe hurmetê negire, em jî hurmetê nadin wan. Em li vir bang li hemû gelê me yê welatparêz dikin ku xwedî li çand, ziman û nirxan derkevin.”
