Endamê Meclisa PJAKê Mazlûm Heften bal kişand ser dîzayna 100 salî ya nû ya li Rojhilata Navîn û destnîşan kir ku Kurd êdî ji bo xwe şer dikin û nabin piyadeyên tu hêzekê. Heften girîngiya Pêvajoya Aştî û Civaka Demokratîk jî destnîşan kir û wiha got: “Em ne gef in ji bo Tirkiyeyê, em piştgiriyê didin aştiyê. Kurd garantiya siberoja herêmê ne.”
Endamê Meclisa Partiya Jiyana Azad a Kurdistanê (PJAK) Mazlûm Heften, têkildarî Şerê Cîhanê yê Sêyemîn, aloziya li Îranê, helwesta Kurdan û Pêvajoya Aştî û Civaka Demokratîk ji Ajansa Mezopotamyayê (MA) re nirxandinên girîng kirin. Heften destnîşan kir ku niha li cîhanê dîzayneke 100 salî ya nû tê kirin û navenda vê dîzaynê jî Kurdistan e.
‘Sê xet di nav têkoşînê de ne’
Heften li ser xalên sereke yên di şerê li Rojhilata Navîn tê jiyîn sekinîn û wiha axivî: “Xeta yekemîn DYA û Îsraîl e ku li pey dîzayneke nû ne. xeta duyemîn bi pêşengiya Îngilistanê û hêzên navneteweyî yên statûkoparêz e ku dixwazin peymana Sykes-Pîcotê nû bikin. Xeta sêyemîn jî Rêya Sêyemîn a Modernîteya Demokratîk e ku Rêberê PKK’ê Abdullah Ocalan diparêze û alternatîfa jiyana hevpar a gelan pêşkêş dike.”
‘Hêzên hegemon tenê li berjewendiyên xwe dinêrin’
Di nirxandina xwe ya li ser rejîma Îranê de Heften bal kişand ser nakokiyên hegemonîk û destnîşan kir ku hêzên serdest guh nadin darvekirin an jî binpêkirinên mafên mirovan ên li Îranê, tenê li berjewendiyên xwe dinêrin. Heften diyar kir ku pirsgirêka herî mezin a Îranê li hundirê wê ye û wiha axivî: “Îranê bi komkujiyên li hemberî serhildana ‘Jin, Jiyan, Azadî’ şaxê ku pê ve girtibû birî. Rejîm teqez divê biguhere, lê gelê Îranê destwerdanên derve qebûl nake, ji ber ku dizane armanca hêzên derve berjewendiyên wan bi xwe ne. Em wekî Kurd, me ev xefik dît û em neketin nava şerê wan. Berê hêzên hegemon dixwestin Kurdan wekî piyadeyên xwe bi kar bînin. Lê bi manîfestoya Rêber Apo re ev xelek şikiya. Kurd êdî xwedî îrade û projeyekê ne, tenê ji bo xwe û ji bo rêya sêyem a demokratîk têdikoşin.”
‘Kurd garantiya siberoja herêmê ne’
Der barê ‘Pêvajoya Aştî û Civaka Demokratîk’ a li Tirkiyeyê de jî Heften helwesta Rêber Apo wekî şoreşeke mezin pênase kir û anî ziman ku dema cîhan xwe dixe nava agir û xwînê, Rêber Apo ji nava tecrîdê qala aştî û azadiyê dike. Heften ev peyam dan: “Fesixkirina tevgereke çekdarî bi serê xwe şoreşek e, lê dewleta Tirk timî hincetan hildiberîne. Tirkiye PJAK’ê û Rojavayê jî wekî hincetekê nîşan dide. Lê me wekî PJAK heta niha fîşekek jî neavêtiye Tirkiyeyê. Hedefa me tenê Îran e û avakirina jiyana hevpar a li wir e. Em ne xetere ne ji bo Tirkiyeyê, berovajî em piştgiriyê didin pêvajoya aştiyê, ji ber ku bandoreke erênî li tevahiya herêmê dike. Kurd garantiya siberoja Tirkiye û tevahiya herêmê ne.”
Banga amadebûnê li gelê Kurd kir
Di dawiyê de Heften bang li gelê Kurd kir û xwest ku li hemberî vê qonaxa fînalê amade bin û axaftina xwe wiha bi dawî kir: “Her kes xwedî planekê ye û em di heyama fînalê de ne. Kurd 100 sal in li ber xwe didin û îro êdî li ser dikê ne. Kî vê rastiyê bibîne wê qezenc bike. Divê gelê me yekîtiya xwe ava bike û biryarên xwe bi xwe bide. Heke em xwe bi rêxistin bikin, em ê teqez bi ser bikevin.”
