Wan – Platforma Jinan a Wanê, ji bo dr. Ayşe Ugurlu a ku ji ber xwendina metneke daxuyaniyê ji kar hatiye dûrxistin, daxuyaniyek da û ji bo piştgiriya dozê banga tevlibûna danişîna wê ya ku dê sibê li Enqereyê bê lidarxistin, kir.
Platforma Jinan a Wanê, ji bo Dr. Ayşe Ugurlu a di Gulana 2025an de ji karmendiya dewletê hatiye derxistin û bi hinceta “heqaret li meqama serokkomariyê kiriye” derbarê wê de lêpirsîn hatiye destpêkirin, li pêşiya Aydin Perîhanoglû AVMê daxuyaniyek da. Di daxuyaniyê de pankarta “Em vê bêhiqûqiyê qebûl nakin” hat vekirin û dirûşma “Jin Jiyan Azadî” hat berzikirin. Tevî endamên platformê gelek jin tev li daxuyaniyê bûn.
Daxuyanî wek ‘tevgerên rûreş’ hatiye hesibandin
Li ser navê platformê endama TÎHVê Ayfer Şahîn Bîlîcî metna daxuyaniyê xwend. Ayfer Şahîn Bîlîcî ku behsa dahatuya bijîşkiya Ayşe Ugurluyê kir, peywirên wê yên di kom û komeleyên mafên mirovan de bi bîr xist. Ayfer Şahîn Bîlîcî diyar kir ku Ayşe Ugurlu di sala 2023an de di çalakiyeke Platforma Jinan a Enqereyê de metna daxuyaniyê xwendiye û ji ber vê metnê bi hinceta “rûmet û hurmeta meqamê Serokkomariyê dipelçixîne, rencîde dike û heqaretê dihewîne” derbarê wê de lêpirsîn hatiye destpêkirin. Ayfer Şahîn Bîlîcî anî ziman ku Ayşe Ugurlu di sala 2025an de ji karmendiyê hatiye dûrxistin û got: “Serokatiya Lijneya Teftîşê ya Wezareta Tenduristiyê di 7ê Nîsana 2025an de lêpirsîna dîsîplînê da destpêkirin û bi hinceta ‘tevgerên rûreş û fedîkar ên ku bi rewşa memurtiyê re neguncav’ daxwaza derxistina wê ya ji karmendiya dewletê kir.”
‘Rexnekirina meqamên giştî azadiya ramanê ye’
Ayfer Şahîn Bîlîcî destnîşan kir ku wezaretê tenê bi lêpirsîna îdarî nehesiyaye û bi hinceta “heqaret li Serokkomar kiriye” serlêdana sûc jî kiriye. Ayfer Şahîn Bîlîcî da zanîn ku di civakên demokratîk de, rexnekirina meqamên giştî beşeke xwezayî û rewa ya azadiya îfadeyê ye û ev tişt li axaftina xwe zêde kir: “Li Tirkiyeyê sûcê ‘heqareta li serokkomar’ her ku diçe wekî amûreke sînordarkirina azadiya raman û îfadeyê tê bikaranîn. Her wiha, di daxuyaniyeke çapemeniyê de ku bi vîna hevpar a platformekê hatibe amadekirin, tenê hedefgirtin û cezakirina kesê/a ku metnê dixwîne nayê qebûlkirin.”
‘Piştgiriyê bidin danişînê’
Ayfer Şahîn Bîlîcî di dawiya axaftina xwe de banga tevlibûna doza Ayşe Ugurluyê kir û got: “Em vê bêhiqûqiyê qebûl nakin. Em li gel Dr. Ayşe Uğurlu ne. Em daxwaz dikin ku sûcdariyên di doza li dijî Ayşe Uğurlu de di zûtirîn demê de werin betalkirin. Em bang li raya giştî dikin ku di dîroka 15.04.2026an de, saet di 10:00an de, li Dadgeha Cezayê ya Asliyê ya 80yemîn a Edliyeya Sîhhiyeyê piştgiriyê bidin danişîna dozê.”
Daxuyanî bi lêdana çepikan û berzkirina dirûşmeya “Jin Jiyan Azadî” bi dawî bû.
