Colemêrg – Rêya Colemêrg û Wanê tevî ev 18 roj in ji ber hezazê hatiye girtin hêj jî nehatiye vekirin. Welatiyên ku bi kîlometreyan di rê de asê mane, bertek nîşanî rewşê dan û gotin: “Heger li cihekî din bana, dê di rojekê de rê vekirina. Ev der bêxwedî ye.”
Rêya Colemêrg û Wanê ji ber hezaz û ketina aşûtê ji 11ê Nîsanê ber bi îro ve girtî ye. Tevî ku nêzî sê hefte ji ser bûyerê re derbas bûn, rêya ku ji ber hezazê hatiye girtin, hîn jî bi temamî nehatiye vekirin. Rêya ku ji bo herêmê gelek girîng e niha tenê bi alî û bikontrol tê bikaranîn. Ev rewş dibe sedema qerebalixiyeke bêdawî. Bi sedan wesayît, kamyon heya otobusên rêwiyan, ên li benda derbasbûnê ne bi kîlometreyan ketin dorê. Welatiyên Colemêrgî yên ku dixwazin xwe bigihînin nexweşxane an jî karên xwe yên lezgîn, rûbirûyê astengiyeke mezin bûne. Welatiyên ku li rê de ji kar û barên xwe û pêdiviyên xwe mane ji ajansa me ra axivîn.
Welatiyan ku nêzî 20 roj in di rê de perîşan bûne, bi hêrs wiha gotin: “Hejdeh roj in ev rê girtî ye. Heger li cihekî din ba, dê di rojekê de ev rê bihata vekirin. Lê ji ber ku em miletê Colemêrg û Geverê ne, kes li me xwedî dernakeve.”
