Colemêrg – Li Colemêrga bi av û kaniyên xwe ve tê naskirin ev nêzî du mehan in pirsgirêka ava paqij tê jiyîn. Welatiyên ji ber ava şêlû û qirêj neçar dimînin ava vexwarinê bi pereyan bistînin diyar kirin ku ev rewş tenduristiya wan dixe xeteriyê.
Li Colemêrga ji ber berfa zêde dibare çem û kanî pir in, her der şîn e. Lê mixabin di nav vê dewlemendiyê de welatiyên Colemêrgê nikarin ji avên şebekeyê ava paqij vexwin. Bi destxistina avê paqij mafeke bingehîn e û rêveberiyên xwecihî bi dabînkirina ava paqij re erkdar in. Herwiha vexwarina ava şêlû û qirêj be, ev ji bo tenduristiya welatiyan bi xwe re xeteriyan tîne. Dîsa ji ber ava qirêj welatî neçar dimînin ku ava hazir bistînin.
‘Hikûmet, partiyên siyasî û rûspiyan bêxwedî hiştin’
Welatî Hebîp Memetoglû diyar kir ku Colemêrg bi salan e bêxwedî hatiye hiştin û wiha got “Çem, av û kaniyên Colemêrgê ewqas zêde ne ku têra bajarekî wekî Stenbolê dikin. Lê mixabin, îro em ji bo avê diçin kaniyên li derve, diçin ser çem û sulavên zozanan da ku avê ji bo xwe bînin navenda bajêr. Colemêrg ji aliyê hikûmetê, partiyên siyasî û rûspiyan ve bêxwedî hatiye hiştin. Ava ku niha diherike, şêlû ye û ji ber ku ji dol û zozanan bi rengekî qirêj diherike, tenduristiya gel dixe xeteriyê. Heke wisa berdewam bike, di nava deh rojan de dê gel tev nexweş bikeve. Çareserkirina vê pirsgirêkê ne bi mesrefên mezin,lê bi xwedîderketin û xebatê pêkan e.”
‘Avên Colemêrgê kêm bûne û yên heyî jî qirêj in’
Welatî Sadullah Besî bal kişand ser pirsgirêkên rêveberiyê û zehmetiyên bidestxistina ava paqij û wiha ev tişt gotin: “Avên Colemêrgê kêm bûne û yên heyî jî qirêj in. Şaredarî di destê qeyûm de ye û ew jî xelkê Colemêrgê nas nake. Em nizanin ji bo çareserkirina vê pirsgirêkê serî li ku derê bidin û daxwazê bikin. Avên qirêj ên ji herêmên çolter diherikin tevlî ava vexwarinê dibin û kaniyên bajêr qirêj dikin. Em neçar dimînin ku ava vexwarinê bi pereyan ji derve bikirin.”
Li Colemêrga warê kaniyan e av nîn e
Huseyîn Apaydin jî dîyar li gel hebûna ewqas çavkaniyên avê, pirsgirêka avê paqij nakokiyeke mezin e û got: “Av hema bêje qet nayê. Gava tê jî pirsgirêkên wê zêde ne. Colemêrg bi kaniyên xwe yên vexwarinê dewlemend e û îsal jî ji ber barîna berf û baranê av pir zêde ye. Lê belê, ez nizanim çima ev av nagihije Colemêrgê. Em nikarin ava li malê vexwin, ji ber ku her tim şêlû û herî ye. Ji ber vê yekê em her tim ava xwe ji derve dikirin.”
