Saziyên Zimanê Kurdî û Platforma Saziyên Demokratîk a Wanê deklerasyona 15ê Gulanê Cejna Zimanê Kurdî ya herêma Serhedê aşkere kirin û daxwaza berfirehtirkirina têkoşîna zimanê Kurdî kirin.
Saziyên zimanê Kurdî û Platforma Saziyên Demokratîk a Wanê li Qada Bajer a navçeya Rêya Armûşê Deklarasyona 15ê Gulanê Cejna Zimanê Kurdî ya Herêma Serhedê aşkere kir. Di deklerasyonê de pankarta “Statuya Kurdî, perwerdehiya bi Kurdî” hat vekirin û lolîpopên “zimanê Kudî dilê gel e”, “Kurd, Kurdî, Azadî”, “Em statuya zimanê Kurdî dixwazin” û “perwerdeyîya bi Kurdkî” hatin rakirin. Tevî endam û rêveberên partiyên siyasî û saziyên sivîl, parlementerên DEM Partiyê û gelek ziman hez jî tev li deklerasyonê bûn.
‘Dixwazin Kurdî ji holê rakin’
Hevserokê Komeleya Pêşxistina Çand û Zimanê Kurdî (KURDÎGEH) Mesût Kertîş metna deklerasyonê xwend û diyar kir ku di encama têkoşîna neteweya Kurd de ew hewldanên asîmlasiyonker têk çûn. Mesût Kertîş anî ziman ku ew zimanê kurdî hê jî di fermiyetê de nayê qebûlkirin û got: “Bi rê û rêbazên nûjenkirî yên cur bi cur tunehesibandin, qedexekirin, dorpêçkirin û pişaftina li ser zimanê kurdî bi awayên cuda berdewam dikin, bi serwerkirina zimanê Tirkî ya li her derê Kurdistanê û li her derê ku Kurd lê dijîn hê armanc û daxwaz ew e ku kurd bên pişaftin û zimanê kurdî bihele û bi demê re holê rabe. Ev jî ku tên zanîn sûcekî mirovahiyê ye.”
‘Tecrîda li ser Ocalan û ya li ser Kurdî rasterast têkildarî hev in’
Mesût Kertîş behsa nêrînên Rêberê Gelê Kurd Abdullah Ocalan kir û bal kişand ser pêvajoya “Aştî û Civaka Demokratîk”. Mesût Kertîş wiha berdewamî da axaftina xwe: “Banga birêz Abdullah Ocalan a ‘Aştî û Civaka Demokratîk’, nîqaşên li ser serbestî û azadiya zimanê Kurdî jî xurtkirin e. Em careke din dibêjin em heta dawiyê li gel vê banga dîrokîne ku diyar dikin mafên neteweya Kurd ên zimanî, çandî, siyasî, hiqûqî û xwerêveberî, ne mijara bazarê ye. Divê hemû astengiyên li ber bikaranîna van mafan ji holê bên rakirin û zimanê Kurdî bibe xwedî statu û zimanê perwerdehiyê de civaka azad, demokratîk û aştiyane bê sazkirin. Bêguman ji bo ku ev yek pêk bê, divê Birêz Abdullah Ocalan bikaribe ji bo pêkanîna aştî û civateke demokratîk serbest û azad tevbigere û bixebite. Ji bo vê jî divê şert û mercên herî guncav bên amadekirin û di serî de zimanê Kurdî, divê nasname û hemû nirx û mafên neteweya Kurd û statuya Kurdan a xwe bi rêvebirinê ji aliyê siyasî û hiqûqî ve bên nasîn, di makezagon û zagonan de bê mîsogerkirin. Em baş dizanin ku tecrîda li ser Rêber Ocalan, tecrîda li ser hemû nirxên neteweya Kurd û bi taybetî tecrîda li ser zimanê Kurdî rasterast têkildarî hev in.”
Xebatên ku dê bikin vegot
Mesût Kertîş derbarê xebatên ku dê ji bo 15ê Gulanê bikin de ev tişt anî ziman: “Li ser bingeha van rastiyan; em ê bi boneya 15ê Gulanê Cejna Zimanê Kurdî, di navbera 4ê gulanê heta 1ê hezîranê, li herêma Serhedê, têkoşîna ji bo çalekiyên ziman, bername û çalakiyên cur bi cur li nava civakê li dar bixin. Li hemû navçe, gund, tax, kolan û malan, li nav ciwan, zarok, zanîngeh, esnaf û hemû qadên din belav bikin. Meş, daxuyaniyên girseyî, xebatên belavok, pankart û bîlbordên bi kurdî, civînên zimanê kurdî yên li nava gel û hemû saziyan, form, kursiyên gel, konên zimanê kurdî, hînkirina alfebeya kurdî, bernameyên helbestxwendin, çîrokbêjî û dengbêjiyê, şano, pêşengehên pirtûkên bi kurdî, panel, sempozyum, komxebat, konferans, şahî, konser, gotebêj, bang û gazî, xebatên cur bi cur ên li ser qada dijîtal, bernameyên li bin banê rêveberiyên xwecihî/şaredariyan, bernameyên li Meclîsê, xebatên dîplomatîk û hwd. plansaziyeke têr û tijî hatiye amadekirin, yê pêk bê.”
Bang li partiyên siyasî û saziyên Kurd kir
Mesût Kertîş bang li partiyên siyasî û saziyên Kurdan kir û wiha berdewam kir: “Bi vê armancê û bîrbaweriyê, em bang li hemû tevger, partî, sazî û derdorên azadîxwaz, aştîparêz, demokrat û mirovperwer; bi taybetî jî bang li jin, ciwan, siyasetmedar, rewşenbîr û li hemû kurdên her çar milên Kurdistanê û li hemû derên cîhanê dijîn dikin. Werin em hemû kurd li dor zimanê kurdî, yekitiya xwe, ya neteweyî ava bikin; her rojê bikin roj û cejna zimanê kurdî; her dem û li her derê têkoşîna parastin û pêşvebirina zimanê kurdî bilindtir û berfirehtir bikin, zimanê kurdî li her qadên civakî û jiyanî bikin xwedîstatu, bikin zimanê perwerdehî, têkoşîn, xebat, têkilî û jiyanê; her mal, gund, kolan, tax, wargeh û jîngehekê bikin dibistan û zanîngeheke kurdî, bikin kurdîgehek.”
15 Gulanê diyarî Sêvê Demîr û Denîz Bulbun kirin
Di dawiya axaftina xwe de Mesût Kertîş 15ê Gulanê diyariyê cangoriyan kir û wiha dawî li axaftina xwe anî: “Bi van hest û ramanan em 15ê Gulanê Cejna Zimanê Kurdî di kesayeta pêşengên zimanê kurdî yên nemir Sêvê Demîr û Denîz Bulbul de diyarî hemû cangorî û têkoşerên zimanê kurdî dikin. 15ê Gulanê Cejna Zimanê Kurdî li me hemû kurdan û li hemû mirovahîparêzan pîroz be.”
