Baroya Colemêrgê derbarê mijara gendeliya ku tê gotin AKPê li navçeya Şemzînanê li ser ÎŞKURê meşandiye, li dozgeriyê serlêdana giliyê kir.
Li navçeya Şemzînan a Colemêrgê rêxistina AKPê ji ber gendeliya di hilgirtina personelên Saziya Kar a Tirkiyeyê (ÎŞKUR) de hatibû fesihkirin û dû re jî Ajansa Mezopotamyayê dîmenek belavkiribû û gendeliya angaşta wê hatibû kirin, piştrast kiribû. Piştî belavbûna dîmen gelek aliyan nerazîbûn nîşanî vê rewşê dan. Baroya Colemêrgê jî derbarê mijarê de li Dozgeriya Komarê serlêdana giliyê kir û daxuyaniyek nivîskî belav kir.
Baroyê destnîşan kir ku esasên bingehîn ên wergirtina personelên ji bo karên giştî liyakat, wekhevî û pabendbûna bi hiqûqê ye. Baroyê diyar kir ku birêvebirina van pêvajoyan bi awayekî şeffaf û li gorî pîvanên objektîf, erk û prensîba dewleta hiquqê ye û got: “Di vê çarçoveyê de tê nirxandin ku heke daxuyaniyên navborî rast bin, dibe ku peywirdarên giştî bi awayekî dijî hiquqê hatibin arastekirin; heke ne rast bin jî, dibe ku baweriya raya giştî ya li hemberî saziyên dewletê bê zedekirin.”
‘Em ê pêvajoya hiqûqî bişopînin’
Baroyê destnîşan kir ku ji bo parastina baweriya li hemberî îdara giştî, girîng e ku her du îhtimal jî werin ronîkirin û wiha pê de çû: “Weke Baroya Colemêrgê, em careke din destnîşan dikin ku bêalîbûna saziyên giştî, prensîba wekheviyê û esasa liyakatê ji bo dewleta hiquqê jiyanî û jêneveger in. Di vê çarçoveyê de, ji bo ku daxuyaniyên navborî ji hêla hiquqî ve werin nirxandin, li beramberî Serdozgeriya Komarê serlêdana pêwîst hatiye kirin. Em ji raya giştî re bi rêz radigihînin ku em ê bibin şopdarê pêvajoyê da ku lêkolînên pêwîst di çarçoveya hiquqê de werin kirin.”
