Girtiyê nexweş Mehmet Salih Fîlîz ku li Girtîgeha Ewlehiya Bilind a Îzmîrê tê ragirtin da zanîn ku dema ew ji bo tedawiyê birine nexweşxaneyê leşkeran lêdaye û tevî ew birîndar bûye jî bi rojan wî nebirine nexweşxaneyê.
Girtiyê bi navê Mehmet Salîh Fîlîz ku li Girtîgeha Ewlehiya Bilind a Îzmîrê tê ragirtin di hevdîtina telefonê ya li gel malbata de ragihand ku roja 30yê Nîsanê dema leşkeran ew birin Nexweşxaneya Yeşîlyurdê çêr û heqaret lê kirine û li wî dane.
Dema ku leşker girtiyê nexweş Mehmet Salih Fîlîz dibin beşa guh, bêvil û qirikê, leşker kelepçeya wî venekirine û nehiştine tedawî bibe. Mehmet Salih Fîlîz ev agahî da malbata xwe: “Çêra dikirin. Gotinên kirêt û heqaret li min dikirin. Em çûn cem bijîşk tundiyeke mezin li ser min kirin. Bijîşkê beşa guh, bêvil û qirikê xwest kelepçe bê vekirin lê leşkeran venekir û gotin em nahêlin wisa tedawî bibe. Dema min got ez naxwazim wiha tedawî bibim leşkeran li singa min xist û êrişê min kirin. Min ji doxtor re got li pêşiya çavên te li min didin. Li rexmî doxtor ji wan re got ‘Ji kerema xwe lê nexin’ jî leşkeran li min dixist. Piştre heya qata jêrîn jî li min xistin. Heya em hatin ber pêpelûkên şewatê jî kamerayê girtin û dîsa êrişî min kirin. Li serê min û pişta min xistin. Piştre min xistin odeyeke biçûk û bi jopan êrişê min kirin. Dema em hatin girtîgehê saet nêzî 3yan bû, min xwest bijîşk bibînim. Ji bo şopên bedena min derbasî girtekan bibin, heya saet 7an min egle kirin. Piştre min birin Nexweşxaneya Dewletê ya Seyfî Demîrsoy. Dema min ji bijîşk re got leşkeran êrişê min kirin, astsubay got derewa dike. Bijîşk rapor nivîsî lê raporeke baş nenvîsî. Rapora ku nivîsî min di 4ê Gulanê de şand Meclîsê, ÎHDê û min giliyê leşkeran kir.”
Mehmet Salîh Fîlîz da zanîn ku di 5ê Gulanê de bi dozger re hevdîtin kiriye û jê re gotiye, “Di laşê min de hîn jî şopên lêdanê hene. Nikarim bi rehetî hereket bikim. Roja yekşemê 3yê Gulanê ez aciz bûm û min gazî îdareyê kir. Ambulans hat lê min nebirin nexweşxaneyê. Min xwest biçim revîrê lê wê jî nekirin. Li bendê ne ku şopên li ser laşê min derbas bibe.”
Mehmet Salih Fîlîz kî ye?
Di sala 2016an de li Mêrsînê hat girtin û binçavkirin, paşê jî ji aliyê Dadgeha Cezayê Giran a 2yemîn a Mêrsînê ve 17 sal û mehek û 15 roj cezayê girtîgehê lê hat birîn. Di 13ê Hezîran 2023yan de ji Girtîgeha Tîpa S a Bodrumê ya ku lê dima şandin Nexweşxaneya Perwerde û Lêkolînê ya Mûglayê.
Derbarê rewşa Fîlîz de, Komîsyona Tenduristiyê ya Nexweşxaneyê raporek amade kir. Di raporê de, Beşa Romatolojiyê ragihand ku nexweşiyeke kronîk ya Fîlîz heye û divê dermankirin û kontroleke birêkûpêk were kirin.
Beşa Gastroenterolojiyê jî ev yek diyar kir, “Nexweşiya Fîlîz kronîk e û divê her 3 mehan carekê were kontrolkirin, tê pêşniyar kirin ku bi tena serê xwe nemîne û di mercên girtîgehê de nikare jiyana xwe bi tena serê xwe bidomîne.”
Filiz, tevî vê rapora bijîşkî jî nehate berdan û şandin Îzmîrê.
