223 karkerên ku ji aliyê qeyimê Şaredariya Bajarê Mezin a Wanê ve ji kar hatibûn derxistin, di roja 289an a berxwedana xwe berdewam kirin û gotin: “Girtina alîgiran ji deriyê paş de ne tenê li keda me, lê di heman demê de li dijî vîna hemû gelê Wanê heqaretek e.”
Li Wanê 223 karkerên ku ji aliyê qeyimê Şaredariya Bajarê Mezin ve ji kar hatibûn derxistin, çalakiya xwe ya ji bo vegera ser kar didomînin. Karkeran di roja 289an a berxwedana xwe de, li ber Edliyeya Wanê daxuyaniyek dan. Di daxuyaniyê de pankarta ‘Em karê xwe dixwazin’ , ‘Em dê bi berxwedanê ser bikevin’ hat vekirin û dirûşmên ‘bijî berxwedana karkeran’ hat berzkirin. Gelek karker tevlî daxuyaniyê bûn.
‘Hefteyek beriya niha bêyî lêkolînê kes wergirtine kar’
Serokê Şaxa Genel-Îşê ya DÎSKê ya Wanê Omer Tekîn metna daxuyaniyê xwend. Omer Tekîn diyar kir ku ew 289 roj in li benda edaletê ne û got: “Kesên ku ji bo birêvebirina şaredariya vî welatî hatine wezifedar kirin, mixabin ne wekî rêveberên giştî, lê wekî serokên bajêr ên partiya desthilatdar tevdigerin. Hê beriya hefteyekê, bêyî ku lêkolînek were kirin û li liyakatê were nêrîn; tenê bi referansa sendîkayên alîgir û bi nêzîkatiya siyasî kes girtine kar. Kesên ku ji bo kar hatine girtin, bi torpîlê û bi nêzîkatiya rêveberên heyî hatine girtin. Heta heke pêwîst be, em dikarin nav bi nav jî eşkere bikin. 223 karkerên ku hatine derxistin, kedkar in û keda her yekî ji wan herî kêm 5 sal e. Maf yê me ye, lê yên ku hatine girtin dibe ku meha xwe jî tije nekirine. Ma têgihîştina we ya heq, hiqûq û wijdanê ev e?”
‘Şaredariya Bajarê Mezin li ser nasnameyê siyasetê dike’
Omer Tekîn destnîşan kir ku ev karkerên nû li şûna 223 karkeran hatine girtin û diyar kir ku rêveberiya Şaredariya Bajarê Mezin bi zelalî nîşan da ku ev kar ne wijdanî, ne hiqûqî û ne jî yasayî ye. Omer Tekîn anî ziman ku rêveberiya Şaredariya Bajarê Mezin bi eşkereyî diyar kir ku siyasetê li ser nasnameyê dike û ev tişt got: “Rêveberiya Şaredariya Bajarê Mezin dibêje; ‘Heke tu ne alîgir bî û serî netewînî, nan ji te re tune ye.’ Lê belê, reng û nasnameya nan, ked û bi birçîbûnê terbiye kirinê nîne.”
‘Li dijî vîna gelê Wanê heqaret e’
Di dawiyê de Omer Tekîn bang li siyasetmedarên bajêr kir û wiha bi dawî kir: “Em bang li hemû siyasetmedarên bajêr dikin; li ser karkeran û li ser keda karkeran siyasetê nekin, heq û hiqûqê li xwediyan vegerînin. Edaleta ku dereng dimîne, ne edalet e. Em 289 roj in li ber derî li benda edaletê ne, girtina alîgiran ji deriyê paş de ne tenê li keda me, lê di heman demê de li dijî vîna hemû gelê Wanê heqaretek e.”
Daxuyanî piştî çalakiya rûniştinê bi dawî bû.
