Hêzên Ked û Demokrasiyê ya Îzmîrê, di 12emîn salvegera Komkujiya Madenê ya Somayê de daxuyaniyek dan çapemeniyê û gotin: “Soma ne qeder e, kuştin e!”
Hêzên Ked û Demokrasiyê yên Îzmîrê, bi boneya 12emîn salvegera karesata madenê ya Somayê, li ber Navenda Çanda Turkan Saylan a li Alsancakê daxuyaniyek da çapemeniyê. Di çalakiyê de pankarta “301 kuştin, ne qeder e” û “Me Soma ji bîr nekiriye û em nadin ji bîr kirin” hate vekirin. Di daxuyaniyê de dirûşmên wekî “Yekîtiya kedkaran dê kapîtalê têk bibe”, “Somayê ji bîr neke, nede jibîrkirin”, “Em ji bîr nakin û efûkirin nakin hatin berzkirin.
Parlamenterê Îzmîrê yê Partiya Wekhevî û Demokrasiyê ya Gelan (DEM Parti) Îbrahim Akin, nûnerên gelek saziyên demokratîk û gelek welatî beşdarî daxuyaniyê bûn. Metna daxuyaniyê li ser navê girseyê ji aliyê Nûnera Herêma Egeyê ya DÎSKê Denîz Şahîn Gumuştekîn ve hate xwendin.
‘Komkujiya Somayê ne qeder e, kuştin e’
Denîz Şahîn Gumuştekîn diyar kir ku tiştên di 13ê Gulana 2014an de li Somayê qewimîn ne qeder û ne jî “fitrat” in û got: “Soma; encama polîtîkayên taşeroniyê ye. Soma berhema hirs û xwedahiya sermayeyê û tercîhên desthilatdariya siyasî ya dijminê karkeran e. Soma, navê wê pergalê ye ku ji bo ‘kêmkirina lêçûnê’ jiyana mirovan tune dihesibîne û ji bo qezanceke zêdetir, karkeran di binê erdê de dişîne mirinê. 301 birayên me yên kedkar, li ber çavan hatin kuştin.”
Em ê dev ji hesab pirsîna 301 madenvanan bernadin
Denîz Şahîn Gumuştekîn destnîşan kir ku heke Soma bê ji bîr kirin, dê Somayên nû biqewimin û wiha dawî li axaftina xwe anî: “Em ji vir bang li desthilatdariyê û derdorên sermayeyê dikin: Karker ne kole ne! Kedkar ne mecbûr in ku dema barê vî welatî hildigirin, rastî mirinê werin. Şert û mercên xebatê yên li gorî rûmeta mirovahiyê ne xêr e, maf e. Rêxistinkirina sendîkayî ne sûc e, mafekî destûrî ye. Careke din em dibêjin: Me Soma ji bîr nekiriye û em nadin ji bîr kirin! Em ê dev ji hesabpirsîna 301 madenvanan bernedin!”
Daxuyanî bi dirûşmên “Li dijî faşîzmê mil bi mil” û “Yekîtiya karkeran dê sermayeyê têk bibe” bi dawî bû.
