Li Bolîvyayê xwepêşandanên li dijî Serokdewletê rastgir Rodrigo Paz Pereira her ku diçe berfirehtir dibin. Di encama êrişa polîsan de xwepêşanderekî jiyana xwe ji dest da, zêdetirî 100 kes hatin binçavkirin û der barê serokê sendîkayê de jî biryara binçavkirinê hat dayîn.
Li Bolîvyayê nerazîbûn û protestoyên li dijî Serokdewletê rastgir Rodrigo Paz Pereira roj bi roj mezin dibin. Li paytext La Pazê di navbera xwepêşander û hêzên ewlekariyê de pevçûnên dijwar derketin. Rayedaran eşkere kir ku di dema pevçûnan de xwepêşanderekî jiyana xwe ji dest daye. Di çalakiyên ku li dijî krîza aborî, kêmbûna sotemeniyê û enflasyona bilind tên lidarxistin de, xwepêşanderan xwestin ber bi Qada Murilloyê ya ku Qesra Serokdewletiyê lê ye ve bimeşin. Polîsan jî bi gaza rondikrêj êrişî xwepêşanderan kir.
Der barê serokê sendîkayê de biryara binçavkirinê
Dozgeriyê, bi îdiayên “terorîzm” û “teşwîqkirina sûc” der barê Mario Argollo yê ku yek ji pêşengên sendîkaya karkeran a herî mezin a welêt e de biryara binçavkirinê da. Çapemeniya xwecihî ragihand ku di dema bûyeran û êrişên hêzên dewletê de zêdetirî 100 kes hatine binçavkirin.
Evo Morales di hedefê de ye
Hikumeta rastgir îdia kir ku li pişt van xwepêşandanan Serokdewletê berê Evo Morales heye. Morales jî li ser hesabê xwe yê medyaya dîjîtal peyameke piştgiriyê ji bo xwepêşanderan parve kir. Li aliyê din hat diyarkirin ku ji ber çalakiyên girtina rêyan ên ku zêdetirî du hefte ne li seranserê welêt dewam dikin, li paytext La Pazê qeyrana kêmbûna sotemenî, xurek û dermanan rû daye.
