TUÎKê daneyên Endeksa Baweriya Serfkaran a Gulana 2026an eşkere kir. Endeksa li ser 200 puanan tê nirxandin wekî 85,8an hate pîvan. Ev rêje nîşan dide ku di nava civakê de baweriya bi aboriyê nîne û reşbînî didome.
Saziya Îstatîstîkê ya Tirkiyeyê (TUÎK) û Bankaya Navendî ya Komara Tirkiyeyê (TCMB), encamên Anketa Meyla Serfkaran û Endeksa Baweriya Serfkaran a meha Gulana 2026an bi raya giştî re parve kirin. Li gorî daneyên fermî yên ku hatine ragihandin, Endeksa Baweriya Serfkaran a ku di meha Nîsanê de 85,5 bû, di meha Gulanê de tenê bi rêjeya ji sedî 0,3 zêde bû û derket 85,8an.
Tabloya reşbîniyê nehat guhertin
Daneyên hatin eşkerekirin krîza aborî û nerazîbûna gel a li hemberî aboriyê careke din radixe ber çavan. Endeksa Baweriya Serfkaran, di navbera nirxên 0 û 200î de tê pîvandin û nirxandin. Li gorî pîvanên vê endeksê; heke encam ji 100î mezintir be, ev yek tê wateya ‘geşbîniyê’ û nîşan dide ku baweriya civakê kêmek bi aboriyê heye. Lê belê heke endeks ji 100î kêmtir be, ev yek di aboriyê de rewşeke ‘reşbîn’ û qeyranê nîşan dide.
‘Reşbînî kûr e’
Ji ber ku endeksa meha Gulanê di 85,8an de ye û bi awayekî berbiçav di bin sînorê 100î de maye, nîşan dide ku welatî ji pêşeroja aboriyê bêhêvî ne û reşbîniya li hemberî bazarê kûr e.
Li gorî pisporên ji bo îbre ber bi geşbîniyê ve biçe divê endeks derekve jorî 150yan. Li Tirkiyeyê ji sala 2024an heta niha reşbîniya têkildarî aboriyê ketiye asta herî jêr û naguhere.
