Ji sebiyê 8 rojî heta dayika 42 salî, 6 endamên malbata Elgun di şevekê de hatin qetilkirin. Bav Davut Elgun ê ji komkujiyê sax maye, tevî ku doz hatiye girtin, ji bo pêkanîna edaletê têdikoşe.
Di sala 1993an de li gundê Xirabreşkê yê girêdayî navçeya Cizîrê ya Şirnexê, di dîroka Kurdistanê de yek ji bûyerên herî hovane yên salên 90î wek komkujiyek pêk hat. Hêzên paramîlîter ên ku wekî kontrgerîla dihatin binavkirin, bi ser mala malbata Elgun de girtin û bê hişyarî erîşê malbatê kirin. Dema ku êrîş pêk hat, malbata Elgun di nava malê de bû. Di encama êrîşê de Nesîbe Elgun a 42 salî li gel zarokên xwe Lokman, Hidir, Nezîr, Hacer û sebîyê 8 rojî Murat Elgun jiyana xwe ji dest dan. Malbat bi gullebaranê hat qetilkirin û şopên wê rojê hê jî di xaniyê ku komkujî lê pêk hatiye de zindî ye. Xaniyê ku malbat tê de bû, di wê şevê de bû goristana wan.
Bavê ku malbata wî di şevekê de hat qitilkirin
Di wê şevê de ji malbatê tenê Davut Elgun ê ku wê şevê ji bo serdana keça xwe ya zewicî çûbû li gundeke din sax ma. Lê ji bo wî jiyaneke tije êş û elem dest pê kir. Hevsera wî û 5 zarokê wî bi howane hatibûn qetilkirin. Ew roja ku vegeriyabû gund, bi rastiya komkujiyê re rû bi rû ma û jiyana wî bi temamî hat guhertin.
Gefên serbaz yên piştî komkujiyê
Piştî komkujiyê, Davut Elgun di gelek qonaxan de rastî zext û gefan hat. Li gorî gotinên Elgun, serbazê bi navê Serdar bi awayekî eşkere li xwe mikur hatiye ku wî bixwe fermana komkujiyê daye û gef lê xwariye ku li ser komkujiyê bêdeng bimîne.
‘Dozgeran got PKKê sûcdar bike’
Dozgerên demê jî hewl dane ku bûyerê berevajî bikin. Dozgerên ku li dosyayê nêrîne, zext li Davut Elgun kirin ku PKKê sûcdar bike. Elgun vê daxwaza ku bi armanca rastiyan veşêrin hatiye kirin, red kir û bibiryar xwest sûcdarên rastîn eşkere bibin.
Bi heman hincetê careke din heman biryar derket
Di çarçoveya lêpirsînên komkujiyên salên 90î de, mijara kesên winda û cînayetên faîlên wan nediyar, yek ji pirsgirêkên herî kûr ên hiqûqî yên Tirkiyeyê ye. Di vê dosyayê de jî, bi hinceta “borîna demê” doz ji aliyê dadgeha Şirnexê hatiye girtin. Bi vî awayî failên ku diviyabû bihatana cezakirin, ji cezakirinê hatine parastin.
Birîna ku bi borîna demê nayê girtin
Dozên bi vî rengî nîşan didin ku pergala dadweriya Tirk, bi taybetî li herêmên Kurdistanê, rêbazên bêcezatiyê kiriye pratîkek fermî.
Heta ku ev dosyeyên girtî neyên vekirin û kesên ku fermanê dane û yên vê fermanê pêk anîne dernekevin pêşberî dadgehan, birînên malbatên qurbaniyan dê her vekirî bimînin.
Davut Elgunê ê 80 salî îro jî li ber xaniyê xwe yê ku êdî bûye goristana malbata wî, bi bîranînên xwe yên bi keser re tenê dimîne.
