Li Mêrsînê mitînga “Ji bo aştiyê azadî” tê lidarxistin û bi hezaran kes tev li bûn. Di mîtîngê de Berdevka TJAyê Bêrîvan Bahçecî anî ziman ku ew silavên xwe ji Rêberê PKKê Abdullah Ocalan re dişînin û got: “Rêberê Gelê Kurd dibêje ‘Heta jin azad nebin civak jî azad nabe.’ Em ê ji bo azadiya jinê û civakê têkoşîna xwe mezintir bikin.”
Bi pêşegtiya Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî)li rex Stadyuma Tevfîk Sirri Gur a li navçeya Akdenîz a Mêrsînê mitînga “Ji bo aştiyê azadî” tê lidarxistin. Ji bajarên Edene, Osmaniye û Hatayê jî gelek kes tev li mitîngê bûn. Her wiha partiyên siyasî, rêxistinên civaka sivîl, endamên Meclisa Dayikên Aştiyê, parlamenterên DEM Partiyê û şandeya CHP’ê jî tev li bû. Di mitîngê de gelek caran dirûşmên “Bijî Serok Apo”, “Bê Serok jiyan nabe” û “Jin, jiyan, azadî” tên berzkirin.
Qada mitîngê bi alên DEM Partiyê hatiye xemilandin.
Di mîtingê de ewil li ser navê Komîteya Amadekar a Mitîngê Emrûllah Şam axivî û gel silav kir. Piştre jî li gorî rêzê Hevseroka DEM Partiyê ya Mêrsînê Bedriye Kuş, li ser navê TJA’yê Berdevka Meclisa Jinan a DBP’ê Bêrîvan Bahçecî, Hevserokê Giştî yê DBP’ê Keskîn Bayindir û Hevseroka Giştî ya DEM Partiyê Tulay Hatîmogûllari axaftin kirin.
‘Mafê kurdan neyê parastin pêvajo pêş nakeve’
Ewil Bedriye Kuş gel silav kir û wiha got: “Gelê me yê ev qad tijî kir dê dîsa dengê xwe bigine Enqereyê. Em hevî û bawer dikin ku dê ev sekn û helwesta gel dê aştiya bi rûmet bîne. “
Li ser navê TJAyê Berdevka TJAyê Bêrîvan Bahçecî jî axivî û wiha got: “Em di pêvajoyek pir girîng re derbas dibin. Ev di her alî de qanexek pir girînge. Di vê qonaxê de qala pêvajoya aştiyê tê kirin. Em vê qonaxê pir girîng û pîroz dibînin. Eger di vê pêvajoyê de mafê jinan, mafê zarokan, mafê gelê kurd neyê parastin û nasîn, mirov nikare qala pêvajoya çareseriyê û aştiyê bike. Ji bo aştiyê ked û bedela herî girîng gelê kurd dide. Herî zêde jin bedelên giran dide. 3 caran bi Rêberê Gelê Kurd re hevdîtin hatin kirin. Em wekî TJAyê vê pêvajoyê gelek girîng dibînin.”
‘Em ji Mêrsînê silavan ji Îmraliyê re dişînin’
Berîvan Bahçecî, da zanîn ku ji bo ev pêvajo pêş bikeve, wekî TJA li her qadê bedelên giran dane û wiha lê zêde kir: ” Birêz Ocalan di hevdîtina herî dawî de slav ji mere şandibûn. Em jî ji qada mîtînga Mêrsînê silavên germ ji Îmraliyê re dişînin. Di vê pêvajoyê de her roj jin tên kuştin, vîna jinê tune tê hesibandin. Pinar Gultekîn ji aliyê mêr ve bi awayekî hov hatibû kuştin. Lê hiqûqa niha mafê jinan nas nake. Dadgehê ev kuştin wekî hovîtî nedît û dosya xera kir. Em dibêjin, çi ferqa pergala AKPê û Îranê heye. Çi ferqa rejîma Îran û Tirkiyeyê heye. Rejîma Îranê jî cezayê darvekirinê daye Pexşan Ezîzî. Heta jin azad nebin, heta gelê kurd mafê xwe bi dest bixin em ê her dem li qadan bin. Em ê her dem têkoşîna xwe bilind bikin. Heta Rêberê Gelê Kurd negêje azadiya fizikî em nikarin qala aştî û çareseriyê bikin. Em bang li hemû jinên ku demokrasiyê dixwazin û mafê jinan diparêzin re dibêjin, heta ku xwediyê felsefeya Jin Jiyan Azadî Birêz Abdullah Ocalan azad nebe em dest ji têkoşîna xwe bernadin. Em tu carî têkoşîna xwe sist nakin. Rêberê Gelê Kurd jî gotibû ‘Heta jin azad nebe, civaka kurd jî azad nabe. Ji bo vê yekê ked û xebat lazim e. Em dubare dibêjin Jin Jiyan Azadî.”
