Amirê polîsan Sirri Erdogan ku bi wesayîta zirxî li parêzer Serkan Karakaş qelibandibû, di danişîna biryarê de hat girtin.
Amirê polîsan Sirri Erdogan di 10ê Nîsana 2022yan de li Şirnexê wesayîta zirxî li endamê Baroya Şirnexê parêzer Serkan Karakaş qelibandibû û ew bi giranî birîndar kiribû. Bi sedema “Hewldana kuştina biqestî” û “Zerardayîna mal” doz li polîs hatibû vekirin. Danişîna biryara dozê li 3yemîn Dadgeha Cezayên Giran a Şirnexê hate lidarxistin. Parêzer Serkan Karakaş, Endamê Desteya Rêveberiya Yekitiya Baroyên Tirkiyeyê (TBB) Alî Bayram, rêveberên baroyên Şirnex, Mêrdîn, Êli û Amedê, Komeleya Hiquqnasên Ji bo Azadiyê (OHD) û gelek parêzer tev li danişînê bûn.
Danişîn bi tespîtka nasnameyê dest pê kir. Bersûc polîs Sirri Erdogan li ser SEGBÎSê beşdarî danişînê bû. Ewilî Sirri Erdogan parastina xwe kir û îdia kir ku nexweşiya şîzofreniyê pê re heye û xwest were beraetkirin.
Piştre parêzer Serkan Karakaş parastinê kir. Parêzer Serkan Karakaş jî diyar kir ku hinceta şîzofreniyê ji bi raporên ATKê hatiye pûçkirin û Sirri Erdogan bi awayekî hovane êrişî wî kiriyê. Serkan Karakaş xwest Sirri Erdogan bê cezakirin. Baroyên tev li danişînê bûn jî bi dorê parastina hempîşeyê xwe kirin û xwestin Sirri Erdogan bê cezakirin.
Piştî navberê şandeya dadgehê biryara xwe eşkere kir. Şandeya dadgehê biryar da ku polîsê bersûc xwestiyê bi hestê cinawirî bikujê û 13 sal û 4 meh cezayê girtîgehê lê birî. Şandeya dadgehê biryar da ku bersûc bê girtin.
Piştî danişînê parêzeran li ber dadgehê daxuyanî dan di daxuyaniyê de endamê parêzer Alî Bayram axivî û anî ziman ku dadgehê biryareke objektîf daye û di encama têkoşîna wan a hiqûqî de biryareke wisa hatiye dayîn.
