Stenbol – Dayikên Şemiyê di çalakiya hefteya 1027an de li aqûbeta Ahmet Yetîşen pirsîn û wiha gotin: “Em dev jî daxwaza xwe ya pêk anîna edaletê bernadin û em dixwazin kiryar bên darizandin.”
Dayikên Şemiyê/Mirovên Şemiyê di hefteya 1027emîn de li Qada Galatasarayê kom bûn û li aqûbeta xizmên xwe yên di binçavan de hatine windakirin pirsin. Di çalakiyê de wêneyên xizmên xwe û qurnefîl hilgirtin. Gelek parêzvanên mafên mirovan, seroka Komeleya Mafên Mirovan (ÎHD) a Stenbolê Gulseren Yolerî û gelek kes tevlî çalakiyê bûn. Di çalakiya vê heftê de li aqûbeta Ahmet Yetîşen ê ku di 14ê Mijdara 1994an de ji hêla polîs, leşker û cerdevanan ve hat binçavkirin û dû re agahî jê nehat girtin. Seroka ÎHDa Stenbolê Gulseren Yolerî daxuyanî xwend.
Gulseren Yolerî, diyar kir ku ji bo Ahmet Yetîşen edaletê dixwazin û got: “Ahmet Yetişen bavê 7 zarokan e ku yek ji wan jêh nehatibû dinê bû. Di 13’yê Mijdara 1994’an de leşker, polîs û cerdevanan li Êlihê du caran saet 19.00 û 23.00’an de bi ser mala wî de girtin. Ekîbên ku Ahmet Yetişen li malê nedîtin bi kurê xwe Hanîfî yê 13 salî re derketin rê. Di 14’ê Mijdarê saetên sibê de heman ekîb ewil çûne mala H.S. Mala N.G. ya ku Ahmet Yetişen lê bû û Ahmet û Hanifi Yetişen li wir hatin binçavkirin û birîn Fermandariya Taburê ya Êlihê. Henîfî ku roja din hat berdan, got ku bavê xwe daliqandî dîtiye û ew jî hatiye îşkencekirin. Êdî pê ve ji Ahmet Yetîşen agahî nehat girtin. Malbata Yetîşen serî li gelek saziyên wekî Serokatiya Meclisê, Serokwezîr, Midûriyeta Polîsan, Qereqola Jendermeyan a Êlihê, Dozgeriya Dadgeha Ewlekariya Dewletê ya Amedê û Walîtiya Rewşa Awarte da. Lê tu encam bi dest nexistin.”
Gulseren Yolerî, diyar kir ku cîranên wan A.B.yê ku bi qasî 11 meh piştî bûyerê hat binçavkirin, diyar kir ku di lêpirsînê de wêneyên cenazeyê Ahmet Yetişen ê tundî û îşkence lê hatiye kirin, nîşanî wî dane û bi kuştinê wî tehdît kirine. Gulseren Yolerî da zanîn ku Hevjîna wî Turkan Yetişen û zarokên wan gelek caran ji bo kiryar bên darizandin serî li dozgeriyê dan û xwestin şahid bên guhdarîkirin û wiha axivî: “Lêpirsînên ku ji aliyê Serdozgeriya Êlihê ve hatin destpêkirin bê encam man.
Di hefteya xwe ya 1027an de em bang li rayedarên dadê dikin ku bikevin nava tevgerê. Em bang li wan dikin ku erka xwe ya ji bo ronîkirina hemû aliyên windakirina Ahmet Yetişen ên di binçavan de bi cih bînin û berpirsyar bên tespîtkirin û bên darizandin.”
Gulseren Yolerî di dawiya axaftina xwe de destnîşan kir ku ew ê dev ji daxwaza edaletê ya ji bo hemû kesên bi salan di binçavan de hatine windakirin bernedin û got: “Divê dewlet li gorî pîvanên hiqûqî yên gerdûnî tevbigere.
Dayikên Şemiyê/Mirovên Şemiyê piştî qurnefîlên li Qada Galatasarayê bi dirûşmên “Ji bo edaletê” û “Ji bo hemû windayan” dawî li çalakiya xwe anîn.
