Amed – TJAyê bi girseyî li pêş Mizgefta Mezin a Amedê li dijî tundiya polîsan a li ser Parlementera DEM Partiyê ya Şirnexê Newroz Uysal Aslan daxuyanî da.
Tevgera Jinên Azad (TJA) têkildarî êrîş û tundiya polîsan a li dijî Parlamentera DEM Partiyê ya Şirnexê Newroz Uysal Aslan, li pêş Mizgefta Mezin a Amedê bi girseyî daxuyanî da. Hevşaredara Bajarê Mezin a Amedê Serra Bucak, Parlementerê DEM Partiyê ya Amedê Adalet Kaya, nûner û rêveberên DEM Partî û DBPê jî di navde gelek kes beşdarî daxuyaniyê bûn. Jinan di çalakiyê de pankarta “Li dijî tundiya dewleta mêrane; Jin Jiyan Azadî” vekirin. Jinan beriya daxuyaniyê dirûşmên “Jin Jiyan Azadî ” berz kirin. Jinan li vir daxuyanî dan û êrîşa polîsan a li dijî Newroz Uysal şermezar kirin. Aktivîsta TJAyê Fatma Sumbul Yetkîn daxuyanî xwend.
‘Em ê têkoşîna xwe mezintir bikin’
Aktîvîsta TJAyê Fatma Sumbul Yetkîn diyar kir ku têkoşîna jinan her diçe mezin bibe û wiha got: “Êrîşa desthilata AKPê ya li dijî jinan ne ji rêzê ye. Êrîşa desthilata AKPê êrîşa li dijî têkoşîna TJAyê ye. Hêrsa mêran a qirker a li dijî têkoşîna jinan a azadiyê, encama bêcezakirinê ye. Desthilatdarî, bi tundiya li dijî jinan û destkeftiyên wan, dixwaze destkeftiyên wan krîmînalîze bike. Desthilata AKPê herî dawî qeyûm tayînî Şaredariyên me kirin. Bi milyonan kesan di hilbijartinê de vîna xwe aşkere kir. Ev êrîşa li dijî azadiya jinê ye. Dewletê bi biryareke keyfî û dijhiqûqî qeyûm tayînî Şaredariya Bajarê Mezin a Wanê kir. Ev înkara vîna gelê Wanê ye. Bi qeyûman û binçavkirinan li gorî hiqûqa dijmin tev digere. Em weke TJA soz didin ku em ê li dijî tundiya ku di şexsê Newroz Uysal, Neslîhan Şedal û Hêlîn Demîrtaş de pêk hat, têkoşîna xwe mezintir bikin.”
Piştre Parlementera DEM Partiyê Adalet Kaya jî anî ziman ku êrîşên li dijî jinan nayê qebûlkirin û ew dê bi felsefeya ‘Jin Jiyan Azadî’ bi ser bikevin. Bi dehan welatî, siyasetmedar hatin binçavkirin. Di heman rojê de Hevşaredarê Bajarê Mezin ê Amedê Dogan Hatun binçav kirin. Parlamêntera Şirnexê Newroz Uysal bi tundî û lîncê re rû bi rû ma. Di dîmenan de jî hat dîtin ku ku endamê Meclîsa DBPê Kenan Îldenîz bi îşkenceya giran re rû bi rû ma û polîsan destê wî şikandin. Bi dehan jin, welatî, zarok û ciwan bi êrîşên polîsan re rû bi rû man. îşkence li jin û zarokan kirin. Em vê zilm û van êrîşan qebûl nakin. Em ê li dijî van êrîşan têkoşîna xwe ya demokratîk xurt bikin.”
