Mexmûr – Hevşaredara Mexmûrê Fatma Bîlen, têkildarî polîtîkayên qeyûm û desteserkirina şaredariyên kurdan got: “Bi zanabûn dest datînin ser şaredariyên kurdan. Aliyekî dibêjin pêvajo û aliyekî jî qeyûman tayîn dikin. Em li benda peyama Rêber Apo ne. Em ê li gorî peyamên Rêber Apo tev bigerin. Divê gelê kurd vîna xwe biparêzin.”
Her ku diçe bertek û nerazîbûnên gel û saziyan a li dijî tayînkirina qeyûm a li ser Şaredariya Bajarê Mezin a Wanê zêdre dibin. Bertek û nerazîbûnek jî ji Wargeha Penaberan a Şehîd Rustem Cûdî (Mexmûr) hat. Hevşaredara Mexmûrê Fatma Bîlen tayînkirina qeyûm a li ser Şaredariya Bajarê Mezin a Wanê bi tûndî şermezar kir. Fatma Bîlen ev kiryar weke binpêkirina vîna gelê kurd bi nav kir.
‘Vîna gelê Kurd tê xespkirin’
Hevşaredar Fatma Bîlen di destpêka axaftinên xwe de tayînkirina qeyûm li ser Şaredariya Wanê bi tûndî şermezar kir û wiha got: “Piştî hilbijartinên Bakurê Kurdistan û Tirkiyeyê, hikumeta AKPê bi zanabûn nêzikatiyek wiha li dijî kurdan da pêkanîn. Vîna gelê kurd tê xespkirin. Em vê yekî qebul nakin û şermezar dikin. Îro em dibînin ku gelê kurd li dijî vê plana qirêj xwedî li vîna xwe derdikeve û li kolananin. Gelê Wanê di hilbijartinan de vîna xwe hilbijart, lê em dibînin niha ew vîn tûne tê hesibandin.”
‘Armanc tunekirina kurdan e’
Hevşaredar Fatma Bîlen di nava axaftinên xwe de bal kişand li ser tûndî û êrişên dewleta tirk ên li ser rojnamevan, gel û xebatkarên ku ji bo parastina vîna xwe li kolanan têdikoşin û wiha pêde çû: “Bi zanabûn şaredariyên kurdan dikin hedef. Her roj êrişî rojnamevanan, xebatkar û gelê kurd dikin. Armanc tunekirina kurdan e. Hevşaredarên me yên Bakûr digirin û vîna me tûne dihesibînin. Ev yek nayê qebulkirin. Emê serî li wan netewînin. Heta ku em şaredariyên xwe bi dest nexin, emê helwestên xwe mezintir bikin. Ji Mexmûrê em slavan dişînin, em bi gelê xwe yê Wanê re ne.”
‘Pêvajo bi qeyûman çênabe’
Hevşaredar Fatma Bîlen tayînkirina qeyûman weke lewaziya dewletê bi nav kir û wiha dirêjî da axaftinên xwe: “Dibêjin emê pêvajoyekî bidin detspêkirin û aliyekî jî êriş dikin. Şaredariyên me xesp dikin. Ev yek nayê qebulkirin. Bi van kiryaran, di çavê kurdan de xwe biçûk dixin. Baweriya me bi dewletê nîne. Qaşo dibêjin emê aştiyê bînin, ev leyîstokeke. Em bawer nakin. Ger ku dewlet rast nêzî pêvajoyê bibe, divê di serî de dest ji van qirêjiyan berde. Piştî hevdîditina bi Rêber Apo re êrişî li ser Rojava, rojnamevan û şaredariyên me zêde bûne. Ev yek lewaztiya wan û bê cidiyeta wan dide diyarkirin.”
‘Ji Mexmûrê silav ji Wanê re’
Herî dawî Hevşaredara Wargeha Penaberan a Şehîd Rustem Cûdî (Mexmûr) Fatma Bîlen anî ziman ku gelê kurd di ferqa planên li ser Rêber Apo, şaredarî û gelê kurd tên meşandin de ne û bi van gotinan dawî li axaftinên xwe anî: “Em wek gelê kurd, ne kurdên berê ne. Emê hertim li dijî zilm û bê heqiyê li ser lingan bin. Em carekdin berxwedana gelê Wanê silav dikin. Em di pêvajoyek gelek girîng re derbas dibin. Ji bo wê em li benda peyama Rêber Apo ne û emê li gor wê peyamê di pêvajoyê de cih bigirin. Divê gelê kurd xwedî li vîna xwe derbikeve.”
