Serokê Baroya Amedê Abdulkadîr Guleç diyar kir ku peyama Rêberê PKKê Abdullah Ocalan perspektîfa destpêka aştiyê ye û got: “Qala çek berdanê tê kirin lê divê dewlet jî di hêla qanûnî de amede bibe û li Meclisê gavên qanûnî bavêje.”
Di 27ê sibatê de Şandeya DEM Partiyê ya Îmraliyê ku ji parlamenterên DEM Partiyê Pervîn Buldan, Sirri Sûreya Onder, Cengîz Çîçek, siyasetmedar Ahmet Tirk, Hevserokên DEM Partiyê Tulay Hatîmogullari û Tuncer Bakirhan û parêzerê OHD Faîk Ozgur Erol li Grava Îmraliyê bi Rêberê PKKê Abdulah Ocalan re hevdîtin kirin. Şande piştî hevdîtinê li Stenbolê peyamê Abdullah Ocalan bi civîna çapemeniyê bi raya giştî re parve kir. Li Amed û Wanê jî peyama Rêberê PKKê Abdullah Ocalan bi beşdariya hezaran hat guhdarkirin. Rêberê PKKê Abdullah Ocalan gelê Kurd, Tirk û cîhanê re “Civaka Aştî û Demokratîk” bangek dîrokî kir. Pîştî bangê li Kurdistanê û Tirkiyeyê gelek nîqaş tên destpêkir. Li ser peyama Rêberê PKKê Abdullah Ocalan û pêvajoyê Serokê Baroya Amedê Abdulkadîr Guleç Ajansa Welat (AW) re axivî.
‘Peyam perspektîfa destpêka aştiyê ye’
Serokê Baroya Amedê Abdulkadîr Guleç diyar kir ku peyama Rêberê PKKê Abdullah Ocalan perspektif û bangawaziya destpêka aştiyê ye û got: “40 sal in pirsgirêka kurd bi şer û pevçûnê tê naskirin lê peyama ku Rêberê PKKê Abdullah Ocalan parvekir nîşan da ku divê pirsgirêka kurd bi rêya demokrasî, aştî û li ser zemîna hiqûqî û sîyasetê bê nîqaşkirin. Peyama Rêberê PKKê Abdullah Ocalan deriyê aştî û demokrasiyê vekir. Heke serokkomar û hikumet jî erênî nêzîkê vê peyamê bibin em bawerin ku aştiyê li ser vê axê pêk were.”
‘Tenê hêvî têr nake’
Abdulkadîr Guleç da zanîn ku kesên ku li Amed û Wanê peyam guhdar kirin bi hêvî nêzîkî peyamê bûn lê tenê hêvî têr nake û wiha got: “Ji bo şer davî bibe divê wek qanûnî gav bê avêtin. Qala çek berdanê tê kirin lê divê dewlet jî di hêla qanûnî de amede bibe û TBMMê de wek zagonî gav bê avêtin. Her wiha ji bo berdana girtiya divê Meclîsê de qanûnê taybet derkevin ku ev pêvajo ber bi erêniyê ve biçe. Hemû kes benda peyama dîrokî bûn û Brêz Abdullah Ocalan ji bo destpêkê rola xwe lîst. Ji bo ku bêtir rola xwe bilîze divê şert û mercên Brêz Ocalan bên guhartin ku fikirê xwe bê asteng bibêje.”
‘Peyamê erênî û bi nirx dibinin’
Abdulkadîr Guleç da zanîn ku platforma ku 123 saziyên sivîl di bin sîwana Platforma Parastina Bajêr û hevkarî ya Amedê xebat dimeşînin partiyên siyasî re hevdîtin pêk anî û got: “Me wek Platform li ser vê pêvajoyê partiyên Tirkiye û partiyên Kurdistanê re civîn pêk anîn. Di wan civînê me de hemû partî jî vê pêvajoyê erênî dibinin. Lê em dixwazin gavên xurtir bên avêtin û bêtir xwedî pêvajoyê derkevin. Em jî wek Baroya Amedê di gav avêtina qanûnî de çi bikeve ser milê me em ê rola xwe bilîzin. Civak piştî peyama Rêberê PKKê Abdullah Ocalan bi hêvîdar bû. Em jî wek Baroya Amedê peyamê erênî û bi nirx dibinin.”
