Fermandariya Biryargeha Navenda Parastina Gel (NPG) ragihand ku di çarçoveya banga Rêberê PKKê Abdullah Ocalan de biryara agirbestê ya partiya wan PKKê ji 1ê Adarê ve, ji bo hemû hêzên wan derbasdar e.
Komîteya Rêveber a PKKê di 1ê Adarê de bi daxuyaniyekê ragihand ku ji bo Banga Rêberê PKKê Abdullah Ocalan a Aşitî û Civaka Demokratîk pêk were, ji îro pê ve (1ê adarê) agirbestê îlan dikin û gotin; “Ji bo pêkhatina mijarên weke çekdanînê jî tenê bi pêşengtiya pratîk a Rêber Apo pêkane.”
Fermandariya Biryargeha Navenda Parastina Gel (NPG) piştî banga PKKê daxuyaniyek nivîskî weşand. Fermandariyê di daxuyaniya xwe de ragihand ku banga partiya wan PKKê ji bo hemû hêzên wan derbasdare.
Daxuyaniya Fermandariya Biryargeha Navenda Parastina Gel wiha ye:
“Di çarçoveya banga Rêber Apo de biryara agirbestê ya ku Partiya me PKKê girtiye û ji dîroka 1ê Adara 2025ê pê ve derbasdar e, ji bo tevahî hêzên me derbasdar e. Hemû fermandarî û yekîneyên eleqedar divê li hemberî biryara ku Partiya me girtî re hesas nêz bibin û bi awayek temam pêk bînin.
Bêguman li hemberî êrîşên ku çêbibin xwe parastina hêzên me û di çarçoveya mafê parastina rewa de bersiva pêwîst dayîn mafêkî bingehîn e. Hêzên me li hemberî êrîşên domdar xwedî mafê mîsîllemeyê ne jî.
Bi taybetî ev biryar li gel hêzên me yên ku li Tirkiyê û Bakurê Kurdistanê ne, ji bo hemû tîmên fedaî yên taybet erkdar in û hemû yekeyên otonom, yekeyên parastina cewherî yên weke MAK, YPS û hwd. jî derbasdar e û divê herkes vê pêk bîne. Hemû pêkhateyên ku xwedî xisleta tevgera otonom in, divê li gorî vê biryarê li ser esasê xwe parastinê ji nûve xwe bi cih bikin. Di vê pêvajoya girîng de tu hêzên me divê di tedbîran de sistbûnê jiyan nekin û di bin her şert û mercê de tedbîrên xwe yên parastinê xurt bigirin.
Di vê pêvajoya dîrokî de ji bo di xeta Rêber Apo de sekn û têkoşînek têrker pêş bixin, divê hemû HPG û yekeyên girêdayî wê hestiyar bin û bi berpirsyar tevbigerin. Li hemberî rewşên provakatîf ên dibe ku çêbibin divê bi tedbîr bin û li hemberî van rewşan baldar bin.
Em bawerin hemû heval li hemberî vê biryarê bi berpirsyar nêz bibin.
Li ser vî esasî hemû fermande û şervanan silav dikin, serkeftinê dixwazin.”
