Saziyên çand û hunerê yên li Amedê têkildarî banga Rêberê Gelê Kurd Abdullah Ocalan daxuyanî dan û destnîşan kirin ku ew xwedî li banga dîrokî derdikevin û ew ê wek hunermendên gel bi berpirsiyariya xwe rabin.
Piştgiriya ji bo “Banga Aştî û Civaka Demokratîk” a Rêberê Gelê Kurd Abdullah Ocalan berdewam dike. Saziyên çand û hunerê yên li Amed û Batmanê ji bo piştgiriyê bidin banga dîrokî li Komeleya Çand û Hunerê ya Dîcleyê ya li navçeya Sûrê bi navê “Hunermend Piştgiriya Banga Serdemê Dikin” daxuyaniya çapameniyê li dar xistin. Gelek hunermend beşdarî daxuyaniyê bûn.
Daxuyaniya bi Kurdî şanoger Omer Şahîn xwend û wênesaz Neşe Toprak jî daxuyaniya bi Tirkî xwend.
Daxuyaniya saziyên çand û hunerê bi vî rengî ye:
“Em banga Abdullah Ocalan xwedî derdikevin.
Weke hunermendên ku bi hêza hunerê bawer in û armanca wan aştiya civakî ye, em piştgiriyê didin banga Aştî û Civaka Demokratîk a birêz Abdullah Ocalan a 27ê Sibatê. Huner ziman û wijdanê gelan e. Em hunermend in ku berhemên ku êşa mirovan sivik dikin, hêviyên wan mezin dikin û daxwazên wan ên azadiyê diyar dikin derdixin holê. Ji ber vê yekê em Bangawaziya Sedsalê ya ji bo rawestandina şer, pevçûn û dubendiya civakî bi qîmet dibînin. Em xwedî li Banga Aştî û Civaka Demokratîk a ji aliyê Birêz Abdullah Ocalan ve hatiye destpêkirin, derdikevin.
Em weke hunermendan bi rola xwe dizanin
Avakirina pergala civakî ya demokratîk ku li ser rêgezên azadî, wekhevî û dadê hatiye avakirin berpirsyariya me hemûyan e. Em weke hunermend di vê pêvajoyê de bi rola xwe dizanin û ji gelê xwe re radigihînin ku em amade ne bi hemû hêza xwe ya hunerê re ji bo civakîkirina aştiyê erka xwe pêk bînin. Di vê pêvajoyê de em careke din diyar dikin ku divê hikûmet bi hesasiyeta birêz Ocalan a ji aştiyê re bi heman hesasiyetê nêzîk bibe. Û wek yek ji muxatabên vê bangê em berpirsyariya bingehîn a dewletê tînin bîra wê. Em girîngiyê didin bingeha hiqûqî û siyasî ya ku birêz Ocalan destnîşan kiriye. Em dizanin ku tenê li ser wê zemînê em hunermendên Kurd dikarin bi azadî huner, ziman û çanda xwe bijîn.
Divê her kes bi berpirsiyarî rabe
Di vê çarçoveyê de em bang li hemû aliyên civakê dikin ku perspektîfa Aştî û Civaka Demokratîk ya ku birêz Abdullah Ocalan eşkere kiriye; bi berpirsyarî rabin. Em ji bo dahatuyeke azad a ku din ava aştiyek bi rumet de geş dibe li vir in û heta avakirina civakek demokratîk em ê têkoşîna xwe bidomînin!”
