Li navçeya Wêranşarê bi hezaran kesan agirê Newrozê pêxist û cejna xwe pîroz kirin.
Li navçeya Wêranşarê ya Rihayê bi şiyara “Rêbertiya Azad Civaka Demokratîk” pîrozbahiya Newrozê hat lidarxistin. Bi hezaran kes beşdarî şahiya ku li qada mezatê ya navçeyê hate lidarxistin bûn. Qada ku pîrozbahî lê hat lidarxistin bi rengên kesk, sor û zer hat xemilandin û li ser dikê pankarta ‘Agirê çaran bû hezar’ hat daliqandin. Welatiyên ku bi cil û bergên xwe yên herêmî ketin qadê, li gel muzîka ku demek dirêj hate lîstin govend gerandin.
Dayika Aştiyê Fatma Akbaş di pîrozbahiyê de axivî û wiha got: “Em bi berdêlên mezin hatine van rojan. Em li ser biryara ku Rêbertî standî disekinin û em baweriya xwe bi Rêbertiya xwe tînin. Em ê bi ser bikevin.”
Rêveberê Navenda DBPê Tarik Yazigan jî wiha got: “Banga birêz Ocalan ji bo têkoşînê mîladeke nû ye. Vê bangê hesreta me ya azadiyê mezin kir. Teqez wê azadiya fîzîkî ya birêz Ocalan pêk were. Em ê bi banga Birêz Ocalan têkoşînê mezin bikin.”
Parlamentera DEM Partiyê ya Rihayê Dîlan Kûnt Ayan ev yek anîn ziman: “Em neviyên Kawa ne, ku serî li ber Dehaqan natewînin. Di 27ê Sibatê de Ocalan agirê Newrozê yê li Îmraliyê vêxist. Em dê vî agirî gur bikin.”
Piştî axaftinan bi pêşengtiya Dayikên Aştiyê agirê Newrozê hate pêxistin û dirûşma “Bijî Serok Apo” hat berzkirin. Ciwanan xwe di ser agir de avêtin û Newrozê bi coş û kelecanek zêde pîroz kirin. Pîrozbahî li ber stranên Kolektîfa Rîtmên Azad û gerandina govendê bi dawî bû.
