Amed – Amed xwe ji bo Newroza dîrokî ya sibê bê pîrozkirin, amade dike. Li Qada Newrozê amadekariyên Newrozê ber bi dawî ve diçin. Çavê her kesî li ser Newroza Amedê ye û her kes çaverêyê peyama Abdullah Ocalan e, ev jî wek suprîzekê tê dîtin.
Wek ku hunermendê navdar Aram Tîgran di strana xwe de dibêje, “Sibeye Newroz e” yanî 21ê Adarê ye, roja Newrozê ye. Bajarê Amedê xwe ji bo Newroza dîrokî ya sibê amade dike. Newroza îsal bi şiyara “Rêbertiya Azad, Civaka Demokratîk” tê lidarxistin. Newroza 2025an di bin siya “Banga Aştî û Civaka Demokratîk” a Rêberê Gelê Kurd Abdullah Ocalan de tê pîrozkirin. Amed sibê wê mazûvaniyê ango şahidiyê ji sed hezaran kes re bike. Li Parka Newrozê ango li qadê amadekariyên ji bo sibê berdewam dikin. Li aliyekî qad tê xemilandin li aliyekî sehneya Newrozê tê amadekirin.
629 rojnamegeran ji bo akredîtasyonê serlêdan kiriye
Wê gelek mêvan jî di protokola Newrozê de cih bigirin. Komîteya Amadekar a Newrozê ji çar aliyên Kurdistanê û derveyî welat re dawetname şandiye. Li bendê ye bi dehan siyasetmedar û rewşenbîr tev li Newrozê bibin. Her wiha îsal 629 rojnamegeran ji bo akredîtasyonê serî li DEM Partiyê dane da ku pîrozbahiya Newrozê bişopînin.
Axêver dê peyaman bidin
Gelek axêver jî beşdarî Newrozê dibin. Hevserokê Giştî yê DEM Partiyê Tuncer Bakirhan û Hevseroka Giştî ya DBPê Çîgdem Kiliçgun Uçar û çend axêver jî dê derkevin ser sehneyê û peyaman bidin. Her wiha stranbêj jî tev li şahiya Newrozê dibin û wê bi sed hezaran kes li ber stranan rakin dîlanê û kêfxweş bikin.
Dibe ku peyam suprîz be
Çavê raya giştî li ser peyama Rêberê Gelê Kurd Abdullah Ocalan e, ka gelo dê peyamek bo Newrozê bişîne an na. Ev peyam jî wek suprîz tê dîtin.
Pankarta pirrzimanî
Pankartê Newrozê ku li ser sehneyê hatiye daliqandin bi pirrzimanî Cejna Newrozê hatiye pîrozkirin. Ev jî pirrengîbûna Newrozê dide nîşandan.
Kemal Kurkut dê were bibîranîn
L aliyê din xwendekarê zanîngehê Kemal Kurkut di Newroza Amedê ya sala 2017an de li ser Cadeya Evrîm Alataş ji aliyê polîsan ve hatibû kuştin. Wê sibê Komîteya Amadekar a Newrozê û komek siyasetmedar beriya bernameya Newrozê li ser cihê ku Kemal Kurkut lê hatiye kuştin wî bibîr bînin û paşê derbasî protokola Newrozê bibin.
