Hevserokê Giştî yê DEM Partiyê Tuncer Bakirhan destnîşan kir ku ew Newrozê li çar aliyên Kurdistanê pîroz dike û got: “Em Cejna Newrozê ya Rêberê Gelê Kurd pîroz dikin. Cejna te pîroz be birêz Ocalan.”
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin. Pîrozbahî bi hemû coş û kêlecanê berdawam dike.
Piştî stranbêj Ayfer Duzdaş peyama Serokê Herêma Kurdistanê Nêçîrvan Barzanî hat xwendin. Cîgirê Nêçîrvan Barzanî Dilşad Şahab nameyê xwend. Nêçîrvan Barzanî di peyama xwe de Newrozê li gelê Kurd pîroz kir û got ew sersala Kurdan cejna Newrozê pîroz dike. Nêçîrvan Barzanî diyar kir ku ew bi dil û can piştevaniya pêvajoya “Banga Aştiyê û Civaka Demokratîk” dikin.
Hevserokê Giştî yê DEM Partiyê Tuncer Bakirhan derket ser dikê gel silav kir û dest bi axaftina xwe kir.
Tuncar Bakirhan cejna Newrozê li çar aliyên Kurdistanê li gelê Kurd pîroz kir.
Axaftina Tuncer Bakirhan wiha ye:
Amed bajarê Newrozê ye
“Nebzê Rohlilata Navîn li Amedê diavêje. Çavê hemû dinyayê li ser Newroza Amedê ye Çimkî Amed Newroz e, Newroz Amed çimkî hûn Newroz in.
Em cejna Newrozê li Rêberê Gelê Kurd pîroz dikin
Em Cejna Newroza Rêberê Gelê Kurd Abdullah Ocalan pîroz dikin. Newroza te pîroz be birêz Ocalan. Birêz Ocalan di 27ê Sibatê de banga sedsalê kir. Ev bang daxwaza gelên Mezopotamyayê ye. Banga bi hev re jiyanek azad e. Banga lihevkirina demokratîk e. Ev bang enyad e. Em ber bi çareseriyek dîrokî ve derdikevin rê. Gelê Kurd sed sal in, ji hemû mafên xwe bêpar hatin hiştin. Êdî dema bidawîkirina vê sedsalê hat. Birêz Ocalan di banga xwe de banga wekheviya her kesî kir. Banga yekitî û têkiliyên gelê Kurd û Tirk kir. Çareserî ne li der ve ye, çareserî di jiyana hevpar a gelan de ye. Werin em bi hev re di vê rêyê de bimeşin. Helwest û sekna me zelal e, mîna îro ku qada Newrozê zelal e. Helwesta me ya aştiyê, azadiyê û çareseriya demokratîk zelal e. Ev peyama bi sed hezaran ku beşdarî Newroza Amedê bûn e.
Ev bang ji bo hemû Rojhilata Navîn wê xweşî û aştiyê bîn e. Her tişt bi yekitiya gelan dikare li pêş bikeve.
Ev pêvajo pir girîng e. Heke beramberî hev gav bên avêtin, wê ev pêvajo bi ser bikeve. Em dewletê vedixwînin jidilbûnê û gavavêtinê. Werin em 85 milyon gel xwedî li Banga Aştî û Civaka Demokratîk derkevin.
Lê desthilatdarî pêvajoyê bi binçavkirin, girtin û tayînkirina qeyûman bi rê ve dibe. Lihevkirina Bajêr tê terorîzekirin. Birêz Îmamoglû tê binçavkirin. Lê em van naxwazin, em aştiyê dixwazin. Em çareserkirina pirsgirêka Kurd dixwazin. Ruh û giyanên çareserkirina pirsgirêka Kurd di banga sedsalê de ye.
Siyaseta Rêya Sêyemîn
Em pirr bi eşkere û zelal dibêjin, ava çem evraz naçe, em dibêjin êdî dem û dewran û pêvajo bi awayek şolî bi rê ve naçe. Xeta me Rêya Sêyemîn e, em ê di vê xeta xwe de bi israr bikin. Rêya me rêya azadî û aştiyê ye. Carek din Nrewoza we pîroz be. Ji me hemûyan re serkeftin.”
