Amed – Hiqûqnas û Berpirsa Navenda Xwendinên Wekheviya Zayendî ya Zanîngeha Dihokê Akademîsyen Dilîn Serdar Zuhdî a li Amedê wek axiver beşdarî panela “Di Pêvajoya Aştiyê de Beşdariya Jinan” bûye û got: “Divê hişmendiya “Bila jin li malê, mêr li derve be” bê şikandin û jin bi dengekî rasteqîn di mekanîzmayên biryardayînê de cih bigirin.”
Şaredariya Bajarê Mezin a Amedê ‘Foruma Aştî û Civaka Demokratîk’ li dar dixe. Gelek siyasetmevan, akademîsyen, parlamenter, hevserok û rayedarên partiyên siyasî, kes û mêvan tevlî forumê dibin. Komeleya Jinan a Rosayê jî bi navê ‘Di Pêvajoya Aştiyê de Beşdariya Jinan û Newekheviya Zayendiya Civakî’ di forumê de panelek li dar xist. Berpirsa Navenda Xwendinên Wekheviya Zayendî ya Zanîngeha Dihokê Akademîsyen Dilîn Serdar Zuhdî ya tevlî panelê bûye ji ajansa me re axivî.
‘Rola jinê tê nîqaşkirin’
Dilîn Serdar Zuhdî di destpêka axaftina xwe de anî ziman ku rol û rista jinê di pêvajoya biryardayinê de hêmayeke jiyanî ye û got: “Bandora jinê hem li ser civakê hem di pêvajoya biryardayînê de sereke ye. Ev pirs di aborî, siyasî û civakî de di nav malbatê de tê nîqaşkirin û îro bûye pirsgirêkeke sereke. Pergala hikûmetê, civak û malbat jî beşên herî girîng ê pêkanîna vê rolê ne.”
‘Jina Kurd her tim xurt e’
Di berdewamiya axaftina xwe de Dilîn Serdar Zuhdî bal kişand ser rola jina Kurd a di dîrokê de û ev tişt anî ziman: “Bêguman rola jinê di dîrokê de her tim girîng bûye. Wekî em dizanin jina Kurd her tim xurt e, dikare di hemû waran de kar bike û bi rola xwe rabe. Babetê herî girîng ê ku niha tê nîqaşkirin, pirsa wekheviya zayendî ye. Mijara herî girîng ew e ku dê, newekheviya zayendî çawa rebe, dê jin çawa bêtir bibin xwedî rol û jin dê çawa bên bêhtir bên guhdarkirin.”
‘Di warê hev fêmkirinê de valahiyek heye’
Dilîn Serdar Zuhdî di dawiya axaftina xwe de destnîşan kir ku pergala civakî û malbat bandoreke mezin li ser rolên zayendî yên jinê dikin û wiha derbirî: “Di vê mijara hev fêmkirinê de valahiyek heye. Her car wisa hatiye fêmkirin ku rola mêr di mekanîzmayên biryardayînê de be û li derve be. Rola jinê jî ew e ku, li malê be. Ev, sedema sereke ya astengkirina jinê ye. Zagon, pergal û civak bi xwe jî gelek bandorê li vê rastiyê dikin. Niha xala herî girîng çawaniya pêkanîna vê hevsengiyê ye. Divê jin xwedî deng û roleke rasteqîn be da ku bikaribe xizmeta vê pirsê bike.”
