Hevseroka Daîreya Têkiliyên Derve ya Rêveberiya Xweser Îlham Ehmed diyar kir ku ji bo her diyalogê xetên sor ên Rêveberiya Xweser hene û bal kişand ser hûrgiliyên diyaloga di navbera Rêveberiya Xweser û desthilata Şamê de. Îlham Ahmed çi li benda Sûriyeyiyan e, eşkera kir.
Hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed diyar kir ku ji bo her danûstandin û diyalogê xetên sor ên Rêveberiya Xweser hene û hûrgiliyên diyaloga di navbera Rêveberiya Xweser û desthilata Şamê de vegot.
Di rûniştineke diyalogê ya bi navê “Lihevkirinên di navbera Rêveberiya Xweser a Herêma Bakur û Rojhilatê Sûriyeyê û hikumeta Sûriyeyê de” ya li bajarê Hesekê hatiye lidarxistin de, Hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehemd hin xalên diyalogê şîrove kirin. Di rûniştinê de rewşenbîrên û kesên girîngiyê didin rewşa siyasî amade bûn.
Îlham Ehmed anî ziman ku peyman gelek aliyên ji bo civakê bi giştî çi li Bakur û Rojhilatê Sûriyeyê yan jî li erdnîgariya Sûriyeyê de vedihewîne û wiha axivî: “Ji lew re ev peyman xwedî gelek xalên şaxî ne û pêdiviya wê bi nîqaşên berfireh heye ku lihevkirinên berfireh di çarçoveya Sûriyeyê bi giştî de werin pêkanîn.”
Îlham Ehmed, destnîşan kir ku hin têbînî li ser performansa desthilata Şamê hene, bi taybet ji bo pêvajoya “Danezana destûrî”, avakirina hikumetê, divê ew werin çareserkirin. Îlham Ehmed wiha got: “Rêveberiya li Şamê berpirs e ku bersiva pirsên civaka Sûriyeyê û pêkhateyên Sûriyeyê li ser madeyên destûrî bide.”
Îlham Ehmed da zanîn ku piştî peymanê yekser, “Danezana destûrî” ya demkî hat derxistin û wiha pêde çû: “Têbîniyên me ji bo danezanê hene û ji bo van xalan têkiliyên me didomin. Danezana destûrî beriya peymanê hatibû amadekirin, piştî peyman hat ragihandin danezana destûrî jî hat derxistin. Dikarî derxistina danezanê bihata paşxistin, ji bo ku komîte û madeyên wê bihatana nîqaşkirin. Ji ber ku komîteya destûrê nûnertiya piranî civaka Sûriyeyê nake.
Îlham Ehmed wiha li gotina xwe zêde kir: “Hemû dizanin ku komîteya destûrê û madeyên wê nûnertiya hêvî û xwestekên gelê Sûriyeyê nakin.”
Têkildarî rola Hêzên Sûriya Demokratîk (QSD) Îlham wiha pê de çû: “Tiştê di navbera QSD’ê û desthilata Şamê de hatiye ragihandin peymaneke giştî bû. Dema komîte bên avakirin wê nûnerên van pêkhateyan hebin. Ew ê komîteyên sivîl û siyasî bin.”
Der barê komîte û demên wan de jî Îlham wiha axivî: “Ji bo avakirina komîteyan hîna me ev pêvajo heta niha derbas nekiriye. Di navbera Şamê û Rêveberiya Xweser de tenê hevdîtinek çêbûye û li ser xalên giştî ên têkildarî dîroka destpêkirina dan û standinan hatin nîqaşkirin.”
Îlham wiha dirêjî da axaftina xwe: “Em bi awayekî cidî girîngiyê didin ser xurtkirina bendên peymanê tevî girîngîdayîna şaxên van bendan, da ku şênî bi giştî ewle bin û bigihînin Sûriyeyeke nû.”
