Şaredariya Bajarê Mezin a Wanê ku ji hêla qeyûm ve tê birêvebirin, daxwaza valakirina avahiya Navenda Jiyana Jinê ya Şamîranê ya ku mulkiyeta Şaredariya Bajarê Mezin e lê Şaredariya Artemêtê bikar tîne, kir. Hevşaredara Artêmêtê Rabîa Başak Koç diyar kir ku divê ev biryara ku wê bi sedan jin mexdûr bike bê terikandin.
Şaredariya Bajarê Mezin a Wanê beriya tayînkirina qeyûm, bi hevkariya Şaredariya Artemêtê Navenda Jiyana Jinê ya Şamîranê di Cotmeha 2024an de li Taxa Sûfan a navçeyê vekiribû. Avahiya navendê mulkiyeta Şaredariya Bajarê Mezin e, lê Şaredariya Artemêtê bi kar tîne û qeyûm xwest Şaredariya Artemêtê avahiya navenda jinan vala bike. Di teblîxa ku ji Şaredariya Artemêtê re hat şandin de hat diyarkirin ku ji bo bikaranîna navendê pêvajoya tehsîskirinê nehatiye kirin. Şaredariya Artemêtê ji bo valakirina navendê ku bi sedan jin di qadên cuda de qursan dibînin û xebatên jinan tên lidarxistin, wext ji Şaredariya Bajarê Mezin xwest. Lê heta niha li hember vê xwestekê ti bersiv nehatiye dayîn.
‘Qeyûm li dijî qadên jinan bêtehamûl e’
Hevşaredara Artemêtê Rabîa Başak Koç bi bîr xist ku piştî navend hate vekirin wan ji bo jinan gelek perwerde û çalakî li dar xistin. Rabîa Başak Koç da zanîn ku ev biryara qeyûmê Şaredariya Bajarê Mezin a Wanê jinan dike hedef û got: “Di meha Cotmehê de bi Şaredariya Bajarê Mezin re bi pêşengiya Hevşaredar Neslîhan Şedal û hevalên jin ên din me ev navend vekir. Li vê navendê ji werzîşê heta semîneran gelek çalakîyên me hebûn ku jin xuya bibin û bên cem hev. Jinan ji dirûtin û neqişandinê bigire heta hunera destan di qursên cuda de xwe pêş ve dibin û ji bo aboriya xwe dixebitin. Her wiha kreşeke me hebû ku ji bo zarokan xizmet dikir. Lê qeyûm li dijî vê qada ku jin bi hêz bûn bêtehamûl bû û ji me hat xwestin ku em avahiyê vala bikin. Bi rastî jî jin bi xwe bûn hedefa daxwaza veguheztina vê navenda ku me bi kedeke mezin vekir.”
‘Divê ev xeletî bê sererastkirin’
Rabîa Başak Koç bal kişand ser pirsgirêka şaredariyê ya der barê avahiyê de û banga sererastkirina xeletiyê kir. Rabîa Başak Koç wiha got: “Tevî şert û mercên neyînî yên aborî jî, me bi kedeke mezin navend ji jinan re vekir û bi dehan amûr û alav kirîn. Heke ev biryar neyê paşvexistin, cihê me nîne ku em van amûr û alavan bi cih bikin û navenda jiyanê ji nû ve aktîv bikin. Her tiştê şaredariyê ji aliyê rêveberiya berê ya qeyûm ve hatiye firotin, lewma cihê me nîn e ku em navendê bar bikin. Divê jinên li vir neyên mexdûrkirin, lewma em li bendê ne ku ev xeletî bê sererastkirin.”
