Meclîsên HDK’ê yên Îzmîrê panelek bi sernavê “Ji qeyûmên ku îradeya me desteser kirin, ber bi rêveberiyên herêmî yên demokratîk ve” li dar xistin.
Meclîsên Kongreya Demokratîk a Gelan (HDK) yên Îzmîrê panelek bi sernavê “Ji qeyûmên ku îradeya me desteser kirin, ber bi rêveberiyên herêmî yên demokratîk ve” li dar xistin. Panel li Navenda Çandê ya Mustafa Necati hat lidarxistin. Siyasetmedar Gultan Kişanak, parêzvana mafên mirovan Nuray Ozdogan û Hevşaredarê Bajarê Mezin ê Wanê Abdullah Zeydan, ku qeyûm tayînî şûna wî hat kirin, axivîn. Panel ji hêla Nevin Daşdemir Dagkiran ve hat birêvebirin. Tevgera Jinên Azad (TJA), Dayikên Aştiyê, Parlamentera Partiya Wekhevî û Demokrasiyê ya Gelan (DEM Partiyê) ya Îzmîrê Burcugul Çubuk û her weha nûnerên gelek partiyên siyasî, rêxistinên girseyî yên demokratîk û gelek welatî tevli bûn.
Nevin Daşdemir Dagikiran, yekem kesa ku di panelê de axivî, diyar kir ku divê rêveberiyên herêmî bibin rêveberiyên ku daxwazên gel bicîh tînin û divê ev rêveberî li ser bingeha civaka sivîl bin û rê bidin gel ku biryarên xwe bidin.
Piştî axaftinê, Abdullah Zeydan diyar kir ku yekem deverên ku ji hêla qeyûmê Wanê ve hatine êrîş kirin saziyên jinan bûn û got, “Hemû saziyên jinan ên ku me ava kirine yek bi yek hatin girtin. Navendên hevgirtina jinan, saziyên kar ên jinan û bernameya me ya Jinkart hatin betalkirin. Xerakirina karta civakî jî yek ji yekem deverên ku wan êrîş lê kir bû. Niha wan otobusên binefşî guherandine kesk. Me her wiha got ku qeyûm nikare hebûna gelê Kurd tehemûl bike. Li gorî nêzîkatiya me ya pirzimanî ya şaredariyê, me dersxaneyên bi zimanên Kurdî û yên din vekirin û ew tavilê hatin girtin. Gelek jin hene ku rastî şîdetê tên.”
Nuray Ozdogan diyar kir ku yekem sîstema ku dewletê di tayînkirina qeyûman de gilî kiriye, sîstema hevserokatiyê ye û di dadgeh û raporan de jî behsa sîstema hevserokatiyê hatiye kirin û hewl hatiye dayîn ku hevserokatî werî krîmînalîzekirin.
Gultan Kişanak, ku di dawiyê de axivî, got, “Ger li rêveberiyên herêmî demokrasî tune be, bi giştî demokrasî tune ye. Tiştê ku em îro dijîn krîzek demokrasiyê ye. Polîtîkayên otorîter heta di derbarê mafên mirovan ên herî bingehîn de jî hatine bicîh kirin.”
Panel piştî axaftinan bi dawî bû.
