Stenbol – Parlamenterê berê yê HDPê Behçet Yildirim û parlamenterê Îdirê yê DEM Partiyê Yilmaz Hûn ku li nexweşxaneya Sirri Sureyya Onder lê tê tedawîkirin disekinin destnîşan kirin ku Sirri Sureyya Onder hemû fikir û baweriyên cuda li dora xwe kom kirin û yekîtiya gelan ava kiriye.
Endamê şandeya Îmraliyê yê Partiya Wekhevî û Demokrasiyê ya Gelan (DEM Partî) û Serkokvekîlê meclisê Sirri Sureyya Onder di 15ê Nîsanê de qirîza dil derbas kir û ew rakirin nexweşxaneyê. Sirri Sureyya Onder ku damara mezin (aort) a dilê wî çiriya li Nexweşxaneya Florence Nightingale ya navçeya Şîşlî ya Stenbolê ameliyat bû. Tedawîya wî didome. Sirri Sureyya Onder piştî ameliyatê derxistin beşa lênihêrîna awarte û rewşa wî ya xetere didome.
Sirri Sureyya Onder 5 roj in li nexweşxaneyê tê tedawîkirin. Ji roja ewil heta niha serdanên nexweşxaneyê jî bê navber didomin. Rojnameger jî ji roja ewil heta niha li ber nexweşxaneyê rewşê dişopîne. Siyasetmedar, rewşenbîr, hunermend û nûnerên saziyên sivîl jî ji roja ewil vê serdana nexweşxaneyê dikin. Her wiha li derdora nexweşxaneyê jî ji bo Sirri Sureyya Onder ji aliyê gel ve pankart hatine daliqandin. Li bajarên Kurdistanê û Tirkiyeyê jî welatî ji bo Sirri Sureyya Onder tên nexweşxaneyê. Parlamenterê DEM Partî yê Îdirê Yilmaz Hûn û parlamenterê berê yê HDPê yê Semsûrê Behçet Yildirim ku bi Sirri Sureyya Onder re xebitîbûn rewşa Onder li nexweşxaneyê dişopînin. Behcet Yildirim û Yilmaz Hûn têkildarî rewşê ji Ajansa Welat (AW) re axivîn.
‘Wê aştiyê bibîne’
Behçet Yildirim ku ji bo Sirri Sureyya Onder ji Semsûrê bi rê ketiye û niha li nexweşxaneyê ye; derbarê rewşa Sirri Sureyya Onder de anî ziman ku dema ew parlamenter bû bi hev re dixebitîn û wiha got: “Tevî ku ew parlamenterê Stenbolê bû jî dilê wî her tim li Semsûrê bû. Bi pirsgirêkên Semsûrê re jî mijûl dibû. Rewşa wî giran e. Lê hêviya me heye ku dê vê rewşê derbas bike. Sirri Sureyya Onder di rêya aştiyê de têkoşiya. Xebateke mezin kir. Ji ber xebat û têkoşîna aştiyê zahmetî jiya û ev nexweşî pê re peyda bûn. Lê em bi hêvî ne dê vê rewşê derbas bike û aştiyê bibine.”
Behçet Yildirim destnîşan kir ku eleqayeke mezin ji bo Sirri Süreyya Onder heye û wiha dirêj kir: “Ji ber ku qasidê aştiyê ye ew qas kes hatin serdanê. Hemû beşên civakê û fikrên cuda li vir kom bûn. Ew yek jî nişan dide ku gelê Kurd û gelê Tirk aştiyê dixwazê. Ew qas kes ji bo aştiyê li vir in wê alaqayê nişan didin. Li Kurdistan û Tirkiyeyê hemû gel tên vir. Sirri ji aliyê herkesî vê tê hezkirin. Em hêvî dikin dê vê nexweşiyê jî derbas bike.
‘Hemû fikrên cûda anîn ba hev’
Yilmaz Hûn jî anî ziman ku di rewşa tendûristiya Sirri Sureyya Onder de cudahiyek tuneyê û wiha axivî: “Hunermend, siyasetmedar û hemû beşên civakê tên serdanê. Li pişt me jî pankart hatine daliqandin. Sirri Sureyya Onder hemû baweriyên cuda, fikrên cûda û gel aniye ba hev. Hundirê nexweşxaneyê û dervayî nexweşxaneyê tijê bû ye. Hemû gel ji bo Sirri Sureyya Onder li gor baweriyên xwe duayan dikin. Ew yek jî yekîtiya gelan nîşan dide. Sirri Sureyya Onder ew yek derxist holê. Ew ji bo aştiyê gelek girîng e. Em jî hêvî dikin tendûristiya wî baş bibe û dîsa bi rol û misyona xwe rabe.”
