Rayberîya Xosere ya Demokratîke qedîyayîşê nobete ya Awbendê Tişrînî îlan kerd û dîyar kerd ke xovderdayîşo ke 100 rojî ra vêşêrî yo bêmabên û fedakarîye dewam kerd, pawitişê erd û destkewteyan de serkewt.
Bi beşdarîya grûbêka girde ya şaranê Vakur û Rojhelatê Sûrîye û heyetêkê Rayberîya Xosere ya Demokratîke ya Herêma Vakur û Rojhelatê Sûrîye, derheqê Awbendê Tişrînî de ke 100 rojî ra vêşêrî yo şarî tede xebata nobete kerda, beyanatêk ame dayene. Girse fotografê cangorîyanê Xoverdayîşê Awbendê Tişrînî, reyna fotografê rojnamegeran Cîhan Bîlgîn û Nazim Daştan ke 19ê kanûne 2024î de û rojnameger Egîd Roj ke 15ê sibate de, wexto ke xoverdayîşê awbendî taqîb kerdêne, hêrişanê hewa yê dewleta tirke de şehîd bîbî, berz kerdî.
Hemserekanê Meclîsa Rayberîya Xosere ya Demokratîke Evîn Swêd û Hisên Osman beyanatî wend.
Rayberîya Xosere şehîdê Xoverdayîşê Awbendê Tişrînî bi rêzdarî ard vîr û heme kesê ke hemverê hêrişanê dewleta tirke û çeteyanê aye de nobeta pawitişî de ca girewt, silam kerd.
Beyanatî bi ziwanê erebkî hetê Hemserekê Meclîsê Rayberîya Xosere Hisên Osmanî ra ame wendene û yê kurmancî zî hetê hemsereka Meclîsê Rayberîya Xosere Evîn Swêd ra ame wendene.
Beyanat wina yo:
“Serê aşma Çile ya 2025î ra nata hêrişê hîrayî hemverê binerd û merkezanê cuye yê herêma ma ameyî kerdene. Bi no hewa hewl da ke îradeyê şaranê azadîwaz û birûmetan binfînê.
Hêrişê dişmenîye bi hewayêko raşteraşt û sîstematîk hetê çeteyanê dewleta tirke ra dorûverê Awbendê Tişrînî de dest pêkerdî û nê hêrişan tehlukeyê girdî awbendê ser o awan kerdê; çunke a sazîyêka cuye ya û awe û enerjîye seba mîlyonan kesan virazena. Çarçewaya nê tehdîdî de welatij û temsîlkaranê Vakur û Rojhelatê Sûrîye bi kurd, ereb û suryanan cewabê vengdayîşê berpirsîyarîya niştîmanî da û beşdarê xovderdayîşo hîra yê şarî bîyî ke binê alaya pawitişê erd û destkewteyan de bi.
8ê Çile ra nata sere de rêxistinê cinî û ciwanan, bi seyan welatijan verê xo da Awbendê Tişrînî, seba pawitişê herême seferberîya pêroyî îlan kerd û kîşta HSD û YPJ’yî de ke mertalêkê xurtî hemverê hewldayîşanê averşîyayîşî bîyê, beşdarê refanê xoverdayîşî bîyî.
Nê xovderdayîşî destanê qehremanî yê hemverê amûranê şerî nuşt û îsbat kerd ke şarê Vakur û Rojhelatê Sûrîye cuya bê şeref û cuya ke azad nîya, qebul nêkenê û amade yê ke heta nefesê xo yê peyênî estbîyayîşê xo bipawê. Coka Awbendê Tişrînî şahîdîya efsaneyê têkoşînî yê keyneke û lajanê xo kerd û rîpelêko zernîn tarîxê şoriş û xoverdayîşî de nuşt.
Serede şehîd Menîce, şehîd Kerem Şehabî, şehîd Harûn, şehîd Ezîz Ereb, Bavê Teyar, şehîd Ronahî Efrîn ma sereyê xo hemverê şehîdanê xo yê qehreman û heme şehîdê ke rayîrê azadîye de canê xo feda kerdo, înan ver de tewînenê. Ma seba heme birîndaran şîfa wazenê û soz danê ke înana ke do keda înan veng nêşîra.
No xoverdayîşo ke 100 rojî ra vêşêr bi vindertiş û fedakarîye dewam kerd, pawitişê erd û destkewteyan de serkewt. Nê bingeyê ser o ma ewro encamnameyê ey bi serkewtiş îlan kenê. Eynî wextî de ma tekez kenê dewamê têkoşînê hemverê her tehlukeyêko newe de bibo.
Bi nameyê Rayberîya Xosere ya Vakur û Rojhelatê Sûrîye ma heme kesanî ke nê xoverdayîşî de ca girewto û heme hêzê xo ke piştgîrî daya xoverdayîşê Awbendê Tişrînî, silam kenê.
Ma xebatkaranê weşîye zî silam kenê ke mîyanê şert û mercanê tewr zehmetan de wezîfeyê xo ca ard. Reyna ma rojnamegeranê ke rastîye resnaye, bi taybetî şehîd Cîhan, şehîd Nazim û şehîd Egîd Roj û heme kesê ke hetê na destanî de bîyî û kîşta şarê xo de bîyî, bi rêzdarî anê xo vîr.
Awbendê Tişrînî bi sembolê yewrêzîya neteweyî, bi kelaya vindertişê şarî yê hemverê dewleta tirke, bi nimûneyêka ganî ya hêzê şaranê hevalbend pawitişê erd û destkewteyanê xo vera heme zehmetîyan.
Şehîdî nêmirenê. Şîfaya bileze seba birîndaran.
Xoverdayîş heta serkewtişî dewam keno.”
