Hevseroka Meclîsa Gel a Mexmûrê Fîlîz Bûdak anî ziman ku şandeya wan li ser banga Bexdeyê çûn bi Wezîre Dadê re hevdîtin kir û piştî hevdîtinê di derketina Bexdeyê de hatin binçavkirine û got: “Hem bi awayekî fermî bang li şandeyê dikin û hem jî binçav dikin. Ev pirsgirêk e.”
Hikûmeta Iraqê şandeya ji Meclîsa Gel a Mexmûrê pêk dihat, dema çûbûn Bexda piştî vegerê di rê de binçav kirin. Ji bo çareserkirina pirsgirêka nasname û ambargoya li ser Wargeha Penaberan a Şehîd Rûstem Cûdî (Mexmûr) şandeyek ji Meclîsa Gel ya Mexmûrê çûbûn Bexda. Şande piştî bi Wezareta Edaletê re hevdîtin kir û şûnde, di vegerê de hate girtin.
‘Çûn û hatina Mexmûrê qedexe dikin’
Têkildarî mijarê Hevseroka Meclîsa Gel a Mexmûrê Fîlîz Bûdak anî ziman ku Meclîsa Mexmûrê ji bo li ser pirsgirêka nasname û ambargoya ya li ser gelê Mexmûrê daxwaz ji Wezareta Edaletê kiribû ku hevdîtinekê bikin.
Têkildarî mijarê Hevseroka Meclisa Gel a Mexmûrê Fîlîz Bûdak bertekên xwe anî ziman û wiha got: “Hikûmeta Iraqê bi qasî mehekê ye ambargoyek giran daniye ser wargehê. Bi taybet di aliyê çûn û hatina wargehê de pirsgirêkan derdixin. Karkerên ku diçin derve û tên digirin. Bi rojan e çûn û hatina Mexmûrê qedexe kirine. 2 hefte berê şandeyek hat vir û me li ser van pirsgirêkan niqaş kir. Gotin ‘em ê biçin Bexdeyê û hiqaşên we bi rayedarên hikûmetê re parve bikin û encamê ji were ragihînin. 2 hefte derbas bûn, lê heta niha der barê encamê de tu agahî nedane.”
‘Der barê şandeyê de em agahî nastînin’
Fîlîz Bûdak, destnîşan kir ku herî dawî duh xeber şandin û gotin ‘Heyetek dikare bê bi wezîrê dadê re bike.’ Fîlîz Bûdak, da zanîn ku wan ji nava meclisê şandeyek amade kir û şand Bexdeyê û wiha berdewam kir: “Şandeyê bi wezîrê Dadê re hevdîtin kir. Piştî hevdîtinê şande dema ji Bexdeyê derdiket, ew binçav kirin. Heta niha der barê rewşa wan de tu agahiya me tune ye. Tenê dibêjin ‘em niha bernadin’ em sedemê nizanin. Em der barê sedema binçavkirina wan de tu tiştî nizanin. Heta niha tu agahî nedane.”
‘Destwerdana vîna gel e’
Fîlîz Bûdak, anî ziman ku wekî gel hewl didin bertekên xwe nîşan bidin û wiha bi dawî kir: “Di şandeyê de Hevserokên Şaredariyê, Nûnerên meclisê, Berdevkê dîplomasiyê hene. Em vê rewşê qebûl nakin. Ev destwerdana vîna Wargeha Mexmûrê ye. Heta niha nasnameyên şêniyên wargehê jî nehatine çêkirin. Di ser nasnameyan re dem derbas bû. Her car hinceta ‘dem di ser re derbas biye’ nîşan didin. Wan bi xwe şande dawet kirine û li gel vê yekê dîsa şandeya me dane girtin. Ev pirsgirêk e û nayê qebûlkirin.”
