Rêveberiya Xweser a Bakur û Rojhilatê Sûriyê ji çileya 2025an heta niha deriyê Kampa Holê li 548 malbatên ku ji hezar û 714 kesan pêk tê vekir û ew şandin cih û warên wan.
Piştî hilweşîna reşîma Baas, çeteyên DAIŞ’ê xwestin ji rewşa heyî sudê bigirin û di nava kampa Holê de tevlîheviyan çêbikin. Ji ber vê hewldana DAIŞê Hêzên Ewlekariya Hundirîn, bi desteka hêzên HSD û YPJê li dijî şaneyên çeteyên DAIŞê operasyoneke ewlehiyê hat lidarxistin û hewldanên terorî pûç kirin. Kampa Holê kampeke herî xeternak a cîhanê ye. Tevî 13 hezar û 124 penaberên Iraqî û 15 hezar û 805 koçberên Sûriyeyî, 6 hezar û 385 jin û zarokên çeteyên DAIŞê li kampê dimînin. Li gorî nûçeyên ku Ajansa Nûçeyan a Hawarê (ANHA) derbas kirine, di 6 mehên dawî de 548 malbatên ku ji Hezar û 714 kesan pêk tê ji Kampa Holê derketin û çûn warên xwe.
840 kes ji Kampa Holê vegeriyan warê xwe
840 kesên ku endamên 224 malbatên iraqî nin, pêk ji kampa Holê derketin û vegeriyan Iraqê. Di çarçoveya hemahengiya di navbera Rêveberiya Xweseriya Demokratîk a Herêma Bakur û Rojhilatê Sûriyeyê û Komîseriya Koç û Koçberan a Parlamentoya Iraqê de, îro beşa 7an a penaberên iraqî yên li kampa Holê diman, ber bi warê wan ve hat şandin. Beşa 7an a penaberan ji 224 malbatan (840 kes) pêk tê û bi tedîbrên Hêzên Ewlekariya Hundirîn û çavdêriya Koalîsyona Navneteweyî ber bi Iraqê ve hat birêkirin.
Ji bo vegerê şande ket nava tevgerê
Rêveberiya Xweseriya Demokratîk bi desthilata Şamê re mekanîzmeyeke hevbeş danî, ku niştecihên Sûriyeyî yên li kampa Holê vegerînin herêmên wan. Serokê Nivîsgeha Karûbarên Koçber û Penaberan a Desteya Karûbarên Civakî ya Rêveberiya Xweseriya Demokratîk a Herêma Bakur û Rojhilatê Sûriyeyê Şêxmûs Ehmed diyar kiribû ku li kampa Holê şandeyeke desthilata Şamê, şandeyeke Koalîsyona Navneteweyî û nûnerên Rêveberiya Xweseriya Demokratîk li hev civiyan.
76 malbat vegeriyan warê xwe
Di çarçoveya biryara Rêveberiya Xweser ya Bakur û Rojhilatê Sûriyeyê û rêveberiya Kampa Holê, di sibatê de li ser daxwaza koçberan 76 malbatên ku 296 kesên ji hêrêmên Dêrazorê ne ku li kampa Holê dimînin vegeriyan cihè xwe.
Di sibatêde veger dabûn rawestandin
Wezîra Koç û Koçberan ya Iraqê ragihand ku wan vegerandina Iraqiyên li nav kampa Holê daye rawestandin. Wezîra Koç û Koçberan ya Iraqê Îvan Fayîq Cabiro bi daxuyaniyek çapemeniyê ragihand ku piştî alîkariyên Amerîkayê sekinîn, ajansên navneteweyî jî xebatên xwe li Kampa Holê dane rawestandin.
148 malbat vegeriyan warê xwe
Di meha çile de komeke nû ya welatiyên Iraqê ku ji 148 malbatan pêk tê, ji Kampa Holê derket û ber bi Iraqê ve hat şandin. Di çarçoveya hevkariya di navbera Rêveberiya Xweseriya Demokratîk a Bakur û Rojhilatê Sûriyeyê û Komîteya Ewlekariyê û Komîteya Koçberî û Koçberan a Parlamentoya Iraqê de, di 25ê Çile de 148 malbatên Iraqî ku ji 578 kesan pêk dihat ji kampa Holê derketin û derbasî Iraqê bûn.
Ji bo vegerê biryar girtibûn
Rêveberiya Xweser a Bakûr û Rojhilatê Suryeyê ku di sala 2019an de ku ji bo koçberên ku di kampa Holê de dimînin, biryareke ku vegerîna koçberan pêş dibîne xistibû meriyetê. Ji sala 20219an ve 24 kom vegeriyane herêmên Dêrazorê. Di sala 2025an de wek koma yekem û ya dawiye ku vegeriyan cihê xwe.
