Amed – Malbatên girtiyên bi navê Seyda Şîmşek û Firat Bilen ku li Girtîgeha Amedê tên ragirtin diyar kirin ku tevî pêvajoyê jî li girtîgehê zext berdewam dikin, poşmantî li girtiyan tê ferzkirin. û berdana girtî Firat Bîlen û Mehmet Şirîn Polat du caran bi dema 6 mehan hatiye taloqkirin.
Girtiyê bi navê Seyda Şîmşek ku nêzî 30 sal in girtî ye û niha li Girtîgeha Ewlehiya Bilind a Hejmara 2yemîn a Amedê tê ragirtin. Di 30ê Mijdara 2025an de 30 salên wî tijî dibin û divê were berdan. Seyda Şîmşek bi rêzê li Girtîgehên Konya, Ceyhan û Kurkçuler ên Edeneyê, Elbistan a Mereşê, Mêrdînê, Mûşê, Tekîrdagê hatiye ragirtin û niha li Girtîgeha Amedê tê ragirtin. Birayê Seyda Şîmşek, Hesen Şîmşek duh bi birayê xwe re hevdîtin pêk anî, têkildarî binpêkirinên mafên girtiyan ji ajansa me re axivî.
‘Şert û mercên zindanê hinekê dijwar in’
Hesen Şîmşek da zanîn ku weke malbat nîv saetê hevdîtin kirin e û wiha got: “Got şert û mercên zindanê hinekê dijwar in û rêveberiya zindanê zextan wan dikin. Ne tene li wan li girtiyên din jî dikin. Hinek hevalan cezayê li wan hatiye birîn xelas bûye jî berdana wan du caran hatiye taloqkirin. Berdana Firat Bîlen û Mehmet Şirîn Polat du caran ji bo dema 6 mehan hatiye taloqkirin.”
‘Poşmantiyê ferzî hevalan dikin’
Hesen Şîmşek bi lêv kir ku girtî hatin û çûyîna nexweşxaneyê jî pirsigirêkan dijîn û axaftina xwe wiha berdewam kir: “Li gorî pêvajoyê nêzîkbûna midurê girtîgehê ne baş e. Dozgerê Înfazê par gazî birayê min kiribû jê re gotibû vaye 29 salên te xelas bûn divê em te berdin. Lê divê tu jî bêjî ‘ez poşman im.’ Ew jî dibêje ‘ez ne poşman im, kesên ez xistime vir bila poşman bin’. Poşmantiyê ferzî gelek hevalan dikin. Heval jî vê qebûl nakin. Piştî vê qebûl nakin dibêjin ji bo ku bêjin ‘em poşman in’ şert û mercên wan giran bikin. Lê hevalên girtî dibêjin, ‘bila baş bizanibin em ne poşman in’.”
‘Di vê pêvajoyê de her ku diçe pirsgirêk zêde dibin’
Hesen Şîmşek bal kişand ser pêvajoya heyî û ev tişt gotin: “Seyda got divê di vê pêvajoyê de şert û mercên wan ne girantir siviktir bin lê mixabin berovajiyê wê dikin. Ji ber vê yeke her ku diçe pirsgirêk mezin dibin. Em dixwazin civak ji vê agahdar be. Girtî dixwazin raya giştî, saziyên malbatên girtiyan li ser vê meseleyê bisekinin, parêzer, parlamenterên di Komîsyona Edaletê ya Meclisê de biçin serdana wan.”
Banga xwedîderketinê
Hesen Şîmşek xwest ku civak xwedî li girtiyan derkeve û ev bang kir: “Em dixwazin parlamenterên me xwedî li girtiyan derkevin û li Meclisê bînin ziman û parêzer bila biçin hevdîtina wan.”
‘Bi awayekî keyfî berdanan taloq dikin’
Birayê girtî Firat Bîlen (26) ku di 2yê Gulana 2017an de hate girtin û niha li li Girtîgeha Ewlehiya Bilind a Hejmara 2yemîn a Amedê tê ragirtin, Ahmet Bîlen jî da zanîn ku divê birayê wî di Îlona 2024an de hatibûya berdan û wiha got: “Bi hinceta cezayê wî yê hucreyê heye berdana wî 6 mehan hatibû taloqkirin. Piştî 6 mehên wî tejî bûn midûrê girtîgehê û sergargiyan gazî wî kirine û gotine tu nikarî ji vir derkevî. Dema kekê min sedemê wê dipirse bêyî sedem nîşan bidin, bi awayekî keyfî bi hinceta ‘ne di rewşeke baş de ye’ berdana wî dîsa 6 mehan taloq dikin. Dibêjin hûn ketine çalakiya greva birçîbûnê, ketiyî hucreyê. Kekê min jî dibêje ‘ji xwe ji ber vê yekê we carekê 6 mehan taloq kir, hûn vê carê ji ber çi taloq dikin?’. Ew jî jê re dibêjin ‘Hûn derkevin derve dibe ku hûn sûc bikin ji ber wê hûn nikarin derkevin’.”
