Şirnex – Malbatên Roboskiyê anîn ziman ku ew piştgiriya pêvajoyê dikin û gotin ku ji bo baweriya wan ji pêvajoyê bê divê dewlet kujerên Roboskiyê darizîne.
Serokê MHPê Devlet Bahçelî di cotmeha 2024an de li meclîse destê xwe dirêjî nûnerên DEM Partiyê kir. Piştre jî bang li Rêberê Gelê Kurd Abdullah Ocalan kir ku li meclisê bang li PKKê bike. Piştî vê bangê li Tirkiyeyê û Kurdistanê pêvajoyek pêş ket. Rêberê Gelê Kurd Abdullah Ocalan jî bersiv da vê bangê û di 27ê Sibatê de peyama “Aştî û Civaka Demokratîk” bi raya giştî re parve kir. Piştî banga Rêberê Gelê Kurd Abdullah Ocalan PKKê jî bersiv da bangê û xwe fesih kir. PKKê di 12 Gulanê de encamnameya kongreya xwe ji raya giştî re parvekir. Aşkera kir ku xwe fesih kiriyê. Piştî biryara PKKê çavê raya giştî ya Kurdistan, Tirkiye û dinyayê jî li hikumeta Tirkiyeyê bû ku gavên şenber bavejin. Lê tevî biryara PKKê jî Tirkiye êrişên xwe li ser herêmên Parastiya Medyayê didomînê û tu gaveke şenber neavetiyê.
Welatiyên Kurdistanê ku di şerê 50 salî de gelek êş û berdel danê jî dixwazin dewlet gavên şênber bavêje. Yek ji wan jî malbatên Roboskî ye. Balafirên şer di 28ê kanûna 2011an de gundê Roboskî yê navçeya Qilebanê ya Şirnexê bombe kiribû. Di êrîşa balafîrên şer de 19 jê zarok 34 welatî hatibûn kuştin. 14 sal borîn, lê hîn hesab nehatiye pirsîn. Di vê pêvajoyê de malbatên Roboskî jî dixwazin hesab ji kujeran bê pirsîn. Dixwazin kujer bên darizandin û cezakirin.
‘Heta kujer bên cezakirin em ê têbikoşin’
Di komkujiya Roboskiyê de yek ji kesê hat kuştin Serhat Encu yê 16 salî bû. Serhat Encu jî bi hevalên xwe re ji bo debara malê çû bû sînor. Di vegerê de di êrîya hewayî de jiyana xwe ji dest da. Dayika Serhat Encu Helîme Encu bi gotina “Di 14 salan de me qet xweşî nedît” êşa xwe tîne ziman. Helîme Encu da zanîn ku tevî 14 sal di ser komkujiyê re derbas bû jî êşa wan weke îro ye û xwest kujerên Roboskî bên cezakirin. Helîme Encu balkişand ser pêvajoya li Kurdistan û Tirkiyeyê destpêkiriyê û wiha dirêjî da axaftina xwe: “Êşa me jan dide. Lê em dibêjin edî bila dilê tu dayikan neşewite. Em bang li dayikên Tirkan jî dikin destê xwe bidin hev. Êdî pêşiya vî şerî bigirin û aştî pêk bê. Ji bo aştiyê divê dewlet jî gavan bavêje. Bi yek alî pêvajo naçe serî. Nezî salakê ye ku pêvajoyek heye. Lê ji aliyê dewletê ve tu gav nehatine avêtin. Em wekî malbatên Roboskî dixwazin kujerên zarokên me bên cezakirin. Em dibêjin bila aştî çêbibe. Lê ji bo wê jî divê dewlet gavan baveje. Heta em sax in em ê ji kujeran hesab bipirsin û bixwazin bên cezakirin.”
‘Ji bo aştiyê divê kujerên Roboskî bên cezakirin’
Yek ji kesên di komkujiya Roboskiyê de hat kuştin Mehmet Alî Tosûn ê 23 salî bû. Bavê Mehmet Alî Tosûn Zekî Tosûn destnîşan kir ku heke dewlet ji dil be divê kujerên Roboskî ceza bike û got: “14 sal di ser komkujiya Roboskiyê re derbas bûn. Lê êşa me nû ye. Em weke malbatên Roboskî hertim dibêjin edalet. Em dixwazin kujerên Roboskî bên cezakirin ku hestirên çavê dayikên Roboskî rawestin. Ne 14 sal hezar sal jî derbas bibin jî em ê komkujiya Roboskiyê ji bîr nekin. Ew komkujî tu car ji bîr nabe. Heke dewlet aştiyê bixwazê divê kujerên komkujiya Roboskî jî ceza bike. Em weke malbatên Roboskî dixwazin dewlet gavên ji dil baveje. Em hemû jî piştgiriya pêvajoyê dikin. Lê em dibêjin divê dewlet jî ji dil be. Lê dewlet tu baweriyê nade me. Tu gavan neavejin. Ne ji dil in. Em jî mafê xwe dixwazin. Divê gavên dualî bên avêtin. Bi yek alî pêş nakeve. Heta kujerên Roboskî neyên cezakirin aştî jî edalet pêk nayê. Ji bo aştî û edaetê divê kujerên Roboskî bên cezakirin.”
‘Ji bo aştî pêk were divê dewlet jî gavan baveje’
Di komkujiyê de yek ji kesê hat kuştin Nevzat Encu yê 19 salî bû. Bavê Nevzat Encu Hîkmet Encu jî bi lêv kir ku weke malbatên Roboskî ew jî dixwazin pêvajo ber bi aştî û demokrasiyê ve biçe û got: “Zarokên me ji bo nanê xwe şehîd bûn. Zarokên me bi bombayên balafîrên Tirkiyeyê hatin kuştin. 14 sal derbas bûn lê hîn tu kes nehatiye cezakirin. Em dixwazin kujer bên cezakirin. Êşa me gelekî mezin e. Êşa me nayê ji bîrkirin. Em wekî malbatên Roboskî dibêjin em piştgiriya vê pêvajoyê dikin. Lê heke ji dil bin, divê kujeran ceza bikin. Em naxwazin dilê tu dayikan bişewitê. Ji bo aştî pêk were divê dewlet jî gavan baveje. Divê di serî de şer bê rawestandin û hemû girtiyên siyasî bêne berdan. Divê kujerên 34 şehîdên Roboskîyê bên cezakirin.”
