Malbat û wasiyê Rêberê Gelê Kurd Abdullah Ocalan û malbatên girtiyên din ji bo hevdîtinê serî li Serdozgeriya Komarê ya Bursayê û Midûriyeta Girtîgeha Îmraliyê dan.
Birayê Abdullah Ocalan, Mehmet Ocalan û wasiyê wî Mazlûm Dînç, xwişka Omer Hayrî Konar, Emîne Konar, birayê Hamîlî Yildirim, Polat Yildirim û xwişka Veysî Aktaş, Melîhe Çetîn bi daxwaza hevdîtinê serî li Serdozgeriya Komarê ya Bursayê û Midûriyeta Girtîgeha Îmraliyê dan. Di heman demê de birayê Ergîn Atabey, Erol Atabey, xwişka Zekî Bayhan Şukran Bayhan û birayê Mahmût Yamalak, Selahattîn Yamalak jî serlêdan kirin. Atabey, Bayhan û Yamalak demek beriya niha sewqî Girtîgeha Îmraliyê hatibûn kirin.
Herî dawî di 7ê Hezîrana 2025an de, bi boneya Cejna Qurbanê hevdîtin pêk hatibû. Di hevdîtinê de biraziyê Abdullah Ocalan Wekîlê DEM Partiyê yê Rihayê Omer Ocalan û xwarziyê wî Alî Ocalan cih girtin. Abdullah Ocalan, di heman demê de piştî 26 salan cara ewil bi du xwarziyên xwe re hevdîtin kir. Di heman rojê de Hamîlî Yildirim jî bi bira û pismamên xwe re, Omer Hayrî Konar bi birayê xwe re hevdîtin kir. Her wiha Veysî Aktaş jî bi xwişk û birayên xwe re hevdîtin kir.
Ergîn Atabey, Mahmût Yamalak û Zekî Bayhan jî di 7ê Hezîranê de bi xizmên xwe re hevdîtin pêk anîbûn.
