Şaxên ÎHDê yên Enqere, Stenbol û Îzmirê û xizmên girtiyên nexweş xwest girtiyên nexweş Mehmet Okur û Hayatî Denîz Kaytan serbest bêne berdan.
Şaxên Komeleya Mafên Mirovan (ÎHD) yên Stenbol, Îzmir û Enqereyê ji bo balê bikşîne ser rewşa girtiyên nexweş li Îzmîr, Enqere û Stenbolê daxuyanî dan û xwestin girtiyên nexweş serbest berdin.
Îzmîr
Şaxa ÎHDê ya Îzmîrê li ber Sûmerbanka kevn a Konakê daxuyanî da. Gelek kes tevlî daxuyaniyê bûn û pankarta “Girtiyên nexweş dimirin. Bêdeng nemînin, nebin şirîkê sûc” vekirin. Rêvebera Şaxa ÎHDê ya Îzmîrê Gulay Gun Bîlîcî anî ziman ku girtiyan biçûk dibînin û heqaretê li girtiyan dikin û wiha got: “Berpirsiyarê tenduristiya girtiyên nexweş dewlet e. Girtî her ku diçe tên îzolekirin, destûr nayê dayîn ku bi girtiyên din re hevdîtinê pêk bînin, li cihên ku tavê nabînin tên girtin.”
Stenbol
Komîsyona Girtîgehan a Şaxa ÎHDê ya Stenbolê çalakiya 664emîn a “Rûniştina F” ya ku her hefte li dar dixe, li ber avahiya şaxa Beyoglûyê li dar xist. Di çalakiya vê hefteyê de rewşa tenduristiyê ya girtiyê nexweş Mehmet Okur ê li Girtîgeha Tîpa F a Hejmara 2 a Kandirayê ya Kocaeliyê ye hat parvekirin û ji bo serbestberdana wî bangawazî hat kirin. Di çalakiyê de pankartên “Bila Mehmet Okur bê berdan” û “Dermankirin maf e, nayê astengkirin” vekirin û pankartên ku wêneyên girtiyên nexweş li sere hilgirtin. Di çalakiyê de gelek caran dirûşmeyên “Dermankirin maf e û nayê astengkirin”, “Tecrîd dikuje, hevgirtin jiyan e” û “Bila Mehmet Okur serbest bê berdan” berzkirin.
Endamê Komîsyona Girtîgehan a ÎHDê Mehmet Acettîn diyar kir ku Okur ê 29 sal in di girtîgehê de ye, bi pençeşêra mesane, KOAH û fitiqê ketiyedivê demildest bê berdan. Acettîn destnîşan kir ku dermankirina Okur a di şert û mercên girtîgehê de ne pêkan e.
Acettîn bang kir ku girtiyên nexweş bên berdan.
Enqere
Înîsiyatîfa Ji Girtiyên Nexweş re Azadî di hefteya 536emîn de li Kolana Sakaryayê daxuyanî da. Di çalakiya vê hefteyê de îşaret bi rewşa Hayatî Denîz Kaytan ê li Girtîgeha Girtî ya Tîpa F a Boluyê girtî ye hat kirin.
Hevserokê Şaxa ÎHDê ya Enqereyê Omer Faruk Yazici diyar kir ku Hayatî Denîz Kaytan ji ber tumora di mejiyê xwe de emeliyat bûye, destê wî yê rastê birîndar bûye û heta asteke zêde nikare bi kar bîne û ji ber nexweşiyê milê wî yê çepê jî diêşe.
Yazmaci xwest mafê jiyanê yê Kaytan bê parastin û heya baş bibe infaza wî bê taloqkirin.
